Хитойнинг Sinovac компанияси вакцинаси Индонезияда ўтказилган синовда 97 фоиз самарадорлик кўрсатди. Бу ҳақда South China Morning Post газетасига таяниб, «Интерфакс» хабар берди.
«Бизнинг клиник тадқиқотлар бўйича гуруҳимизнинг бир ой ичида аниқлашича, дастлабки маълумотлар 97 фоиз ҳолларда самарадорлик кўрсатди», — деган Индонезиянинг Bio Farma фармацевтика компанияси вакили Иван Сетивиан.
Индонезия 7 декабрь куни коронавирусга қарши Sinovac вакцинасидан 1,2 миллион доза олганди, январь ойида яна 15 миллион доза олишни режалаштирмоқда.
Айни пайтда Хитойнинг тўртта вакцинаси клиник синовларнинг учинчи босқичида. Уларнинг иккитаси Sinopharm корпорацияси томонидан, яна бири SanSinoBIO, тўртинчиси эса Sinovac компанияси ишлаб чиқмоқда.
Маълумот учун, Sinovac Хитойдаги тадқиқот компанияси бўлиб, вакцина яратиш ва уни сотишга ихтисослашган. Компания расмий сайтида маълум қилинишича, Sinovac Хитойда вакцина технологияси соҳасида 12 та патентга эга.
Туркия Хитойнинг ушбу компаниясидан 50 миллион доза вакцина буюртма қилган.
Аввалроқ Pfizer ва BioNTech ўзининг BNТ1622б вакцинаси тадқиқотларининг учинчи босқичи якунлари бўйича 95 фоиз самарадорлик кўрсатганини маълум қилганди. Россиянинг «Спутник V» вакцинаси самарадорлиги ўз ишлаб чиқувчилари томонидан 92 фоизга, Американинг Moderna компанияси вакцинаси — 94,1 фоизга (касалликнинг оғир шаклида эса 100 фоизга), AstraZeneca компанияси вакцинаси — 70 фоизга баҳоланган.
Изоҳ (0)