АҚШ президенти Дональд Трамп имзолайдиган фармонга мувофиқ, америкаликлар эмланганидан кейингина коронавирусга қарши вакциналар бошқа мамлакатларга ҳам етказилишни бошлайди. Бу ҳақда президент маъмуриятидаги юқори мансабли амалдорларга таяниб, Fox New телеканали хабар берган, деб ёзади «РБК».
«Биринчи галдаги вазифа ушбу вакциналарни бутун дунё бўйлаб етказиб беришдан олдин уларни америкаликлар орасида тарқатишни таъминлашдан иборат», — деди телеканал манбаларидан бири.
Унинг прогнозига кўра, мамлакатда барча хоҳловчилар эмланганидан кейин, баҳор охири — ёз бошларида АҚШ вакциналарни халқаро фойдаланишга етказиб беришни бошлайди.
Яна бир мансабдор айтишича, COVID-19’га қарши вакциналар АҚШда «жуда яқин орада» тақдим этилади. Унинг сўзларига кўра, Трампнинг фармони соғлиқни сақлаш вазирлиги ва ижтимоий хизматлар зиммасига вакцинани аҳоли орасида «ҳеч мисли кўрилмаган» тезлик билан тақсимлаш тартибини белгилашни юклайди.
АҚШ вакцинадан халқаро фойдаланиш имкониятини йўлга қўйгач, ночор мамлакатларнинг дорини сотиб олишига ёрдам бериш учун манбаларни жалб қилади, дея қўшимча қилди телеканал манбаси.
Трампнинг эҳтимолий фармони ҳақидаги хабарлар АҚШ санитар назорат бошқармаси (FDA)нинг мажлисидан бир неча кун аввал пайдо бўлди, унда регулятор Американинг Pfizer ва Германиянинг BioNTech компаниялари вакцинасидан фойдаланишни маъқуллаш-маъқулламаслик масаласини ҳал қилади. Мамлакатда Американинг Moderna компанияси ишлаб чиққан яна бир вакцинани рўйхатдан ўтказиш масаласи эса келаси ҳафта, 17 декабрь куни кўриб чиқилади.
Иккала вакцина ҳам синовлар чоғида юқори самарадорлик кўрсатди. Pfizer дорисининг самарадорлиги 95 фоиз, Moderna вакцинасиники — 94,1 фоиз (оғир ҳолатларда 100 фоиз)ни ташкил этди.
Bloomberg хабарига кўра, АҚШ Pfizer вакцинасидан 600 миллионта дозани олдиндан буюртма қилиб қўйган. Йил охиригача компания 100 миллионта доза ишлаб чиқариши керак эди, аммо унда илк босқичларда хом ашё етказиб бериш билан боғлиқ муаммолар юзага келди, шу сабабли икки марта камроқ доза ишлаб чиқаради.
Изоҳ (0)