Аввал хабар берганимиздек, «Пандемия шароитида туризм» лойиҳасини ташкил қилган Туркия маданият ва туризм вазирлиги ўзбекистонлик журналист ва блогерлар қаторида «Дарё» мухбирини ҳам Туркиянинг Истанбул ва Анталия шаҳарларига таклиф этган эди.
Сафар дастурининг илк кунида гуруҳ туризм соҳаси энг тараққий этган ҳудудларидан бири Истанбулнинг шаҳар марказидан шимоли-ғарбгача 35 километр узоқликдаги янги аэропортига келиб қўнди. Айни вақтда у йилига 90 миллион йўловчини қабул қилади. Яқин 10 йилда ушбу кўрсаткични 200 миллионга чиқариш режалаштирилмоқда. Аэропортда битта улкан терминал маҳаллий ва халқаро авиақатновларни қабул қилувчи ҳудудларга ажратилган. Унда 5 та пирс-блоклар ва 114 та (Отатурк аэропортида 41 та) гейт мавжуд. А ,B, D ва F халқаро, G маҳаллий авиақатновлар учун мўлжалланган.
Асосий терминалдаги Duty Free ҳудудининг умумий ўлчами 55 минг квадрат метр. Улардан 34 минг квадрат метри классик маҳсулотларга эга мавзули ҳудудлар, 18 минг квадрати люкс тоифадаги бренд дўконлар, 3 минг квадрати эса маҳаллий ишлаб чиқарувчиларнинг маҳсулотларидан иборат бозорни ташкил қилади. Яна 32 минг квадрат метри қаҳвахона ҳамда ресторанларга берилган. 3 ярим минг хавфсизлик хизмати ходимлари ва 9 минг дона видеокамера хавфсизликка жавоб беради. Авиахавфсизлик назорати стандарт.
Истанбулдаги янги ёки учинчи аэропорт кириш қисми.Фото: «Дарё» / Мадина Нурман
Истанбулдаги янги аэропортда тозалик ишлари мунтазам олиб борилади.Фото: «Дарё» / Мадина Нурман
Авиахавфсизлик ҳудудида чипта талони, электрон воситалар, ноутбук ёки планшетлар чиқариб махус идишларга солиб назоратдан ўтказилади. Ҳар бир йўловчидан кейин буюмлар солинган идишлар дезинфекция қилинади. Аэропортда ижтимоий масофа сақлаш, дезинфекция қилиш, пандемия қоидаларига риоя қилиш ҳақида эслатмалар мавжуд. Бу каби эълонлар карнайлар орқали ҳам бир неча марта қайтарилади.
Истанбулдаги янги аэропортнинг маҳаллий рейслар амалга оширилувчи қисми.Фото: «Дарё» / Мадина Нурман
Истанбулдаги янги аэропортда йўловчилар хавфсизлиги, ижтимоий масофани сақлаш ва тартиб учун махсус тасмалар тортиб қўйилган.Фото: «Дарё» / Мадина Нурман
Рўйхатга олиш ҳудуди.Фото: «Дарё» / Мадина Нурман
Ҳар бир фойдаланувчи қурилмалар олдида қўлни дезинфекцияловчи ускуналар ўрнатилган.Фото: «Дарё» / Мадина Нурман
Сайёҳлар учун суғурта пакетлари ишлаб чиқилган. COVID-19 тестини ўз ичига олган тиббий суғурта пакети ташкил этилган. Унга кўра, шартнома билан аэропортлардан олинган авиачипталар, турли савдо жойлари, тур операторлар ва онлайн каналлар орқали харид қилиш мумкин бўлган 15, 19 ва 23 евролик суғурта пакетлари доирасида 3 минг, 5 минг ва 7 минг еврогача барча тиббий харажатлар қопланади. Аэропортда, самолётда, жамоат жойларида ниқобни талабларга мувофиқ тақмаганларни масъул ходимлар келиб огоҳлантириб кетиш ҳолатларини ҳар қадамда учратасиз.
Аэропортнинг деярли ҳар бир бурчагида карантин қоидаларини ёдга солувчи эслатмалар мавжуд.Фото: «Дарё» / Мадина Нурман
Аэропортда ниқоб ва антисептик воситаларни хавфсиз харид қилиш учун аппаратлар ўрнатилган.Фото: «Дарё» / Мадина Нурман
Пандемия шароитида сайёҳлар хавфсизлигини таъминлаш масаласи ўта долзарб вазифа эканлигини айнан аэопорт остонасидан англаб олиш осон. Туркиянинг Маданият ва туризм вазирлиги 2020 йил ёзидан амалга киритилган «Соғлом туризм сертификати» дастурини ишлаб чиқиб ишга туширган. Маданият ва туризм вазирлиги бошчилигида, Ички ишлар ва Ташқи ишлар вазирлиги иштирокида ҳамда туризм саноатининг барча асосий иштирокчилари билан яқин ҳамкорликда ўтказилаётган «Соғлом туризмни сертификатлаш» дастури туризм соҳасидаги ташкилотлар томонидан, туристик сектор меҳмонлари ва ходимларининг саломатлиги, уларни ташиш, жойлаштириш борасидаги татбиқ қилиниши шарт бўлган, кенг кўламдаги тадбирлар устидан олий даражадаги назоратни амалга оширади. Халқаро сертификатлаш идоралари томонидан бериладиган ушбу сертификат авиакомпаниялар, аэропортлар ва бошқа транспорт объектлари, турар жой сектори, ҳамда жамоат овқатланиш ташкилотларида Соғлиқни сақлаш, меҳнат гигиенаси бўйича юқори талабларнинг бажарилишини ҳужжатлаштирилган тарзда тасдиқлайди.
Аэропорт ички қисми тоза ҳаво билан мунтазам таъминлаб турилишини билдирувчи экран ёзувлари.Фото: «Дарё» / Мадина Нурман
Меҳмонларнинг Туркияда таътилни хотиржамликда ўтказишини таъминловчи «Хавфсиз туризм сертификати» дастурига оид барча маълумотлар тўғрисида tga.gov.тр сайтида ўқиш мумкин.
«Соғлом туризм сертификати»га эга меҳмонхона.Фото: «Дарё» / Мадина Нурман
Анталия шаҳри
Анталия Ўртаер денгизи соҳилларида жойлашган энг машҳур курорт шаҳарлардан ҳисобланади. Мамлакат жанубидаги ушбу шаҳар тарихда Памфилия деб номланган. Тўрт томони Тавр тоғлари билан қуршалган ҳудудни бир вақтлар Мустафо Камол Отатурк «Турк соҳилларининг гўзал шаҳри», деб атаган. Жаннатмакон ҳудуд табиат ва меҳнаткаш одамлар қўли билан бунёд этилган. Экзотик боғлари, денгиз бўйидаги сўлим гўшалари ва палмалар аллеяларидан баҳра олиш мумкин.
Иқлими илиқ, барқарор бўлгани сабабли йил бўйи сайёҳлар учун мақбул маскан ҳисобланади. Римликлар ва салжуқийлар томонидан бунёд қилинган эски шаҳар қадим қурилиш намуналари, минора ва масжидлар, сершовқин савдо кварталларидан иборат бўлгани сабабли ҳақиқий шарқ нафаси келиб туради.
Эслатиб ўтамиз, Туркия президенти Ражаб Тоййиб Эрдўғон 30 ноябрь куни коронавирус тарқалишига қарши чеклов чоралари кучайтирилишини маълум қилган, унга кўра, иш кунлари маҳаллий вақт билан соат 21:00 дан эрталаб соат 05:00 гача мамлакат бўйлаб амалда бўладиган комендантлик соати кирган. Дам олиш кунлари — жума куни соат 21:00 дан, душанба куни эрталаб соат 05:00 гача одамларнинг кўчага чиқиши тақиқланади.
Бунгача Туркияда фақат дам олиш кунлари комендантлик соати мавжуд эди. Ражаб Тоййиб Эрдўғон 17 ноябрь куни COVID-19 пандемияси сабабли янги чеклов чоралари жорий этилишини маълум қилганди.
Изоҳ (0)