Россия Савдо-саноат палатаси раҳбари Сергей Катирин юқори малакали мутахассисларнинг Россияга оиласи билан бирга келишлари учун рухсат берилишини сўради. Мазкур таклиф қайд этилган хат бош вазир Михаил Мишустинга йўлланган, деб хабар беради «Коммерсантъ».
Катириннинг сўзларига кўра, Савдо-саноат палатасига ишбилармон доиралар вакилларидан хорижий фуқароларнинг пандемия даврида мамлакатга кириб келишини енгиллаштириш бўйича кўплаб илтимослар келиб тушмоқда.
«Хорижлик юқори малакали мутахассисларнинг Россияга ҳар бир киришини мувофиқлаштириш тўғрисидаги талабни чиқариб ташлаш керак (биринчи марта киришини мувофиқлаштиришнинг ўзи етарли), шунингдек, юқори малакали спорт мутахассислари учун яқинда қабул қилинган қарор бўйича юқори малакали мутахассисларнинг оила аъзоларига кириш ҳуқуқини бериш лозим», — дейилади хатда.
Бундан ташқари, Сергей Катирин Россияга ишлаш учун келувчи хорижлик фуқароларнинг фаолиятини тартибга солишни сўраган. Унинг таъкидлашича, ҳозирда чет элдан ишчи кучини жалб этадиган Россия компаниялари кадрлар танқислигига дуч келмоқда, хусусан, МДҲ мамлакатларидан. Хатда меҳнат мигрантларининг мамлакатга кириш процедураларини белгилаб олиш лозимлиги сўралган. Бунинг учун чет эллик ишчиларни Россияга етказиб беришни ташкил этиш, тест ўтказиш, керак бўлганда ўзини яккалаш ва тиббий ёрдам кўрсатиш учун иш берувчилар кафолатларини белгилаш таклиф қилинмоқда.
Стратегик тадқиқотлар маркази маълумотларига кўра, анъанавий равишда мигрантлар меҳнатидан фойдаланиб келган Россиядаги компанияларнинг тахминан 40 фоизида ишчи кучи етишмаслиги кузатилмоқда.
Аввалроқ Ўзбекистон Бандлик ва меҳнат муносабатлари вазирлиги Россиянинг бешта шаҳрида рус тили, ўз касби бўйича малака ошириш, янги касб ўрганиш йўналишлар бўйича 1 ойлик (72 соатлик) ва 2 ойлик (144 соатлик) ўқув курслари ташкил этилишини маълум қилганди. Шунингдек, Россияда ўзбек мигрантлари учун касб ва тил ўргатиш тўгараклари йўлга қўйилиши билдирилган.
Изоҳ (0)