Тошкентда шаҳвоний хизматлар кўрсатиш билан шуғулланиб келган йирик уюшган жиноий гуруҳ қўлга олинди. Бу ҳақда ИИВ Тергов департаменти хабар берди.
Фото: ИИВ Тергов департаменти
Қайд этилишича, сентябрь ойида Тошкент вилояти ИИББ ва бошқа ҳуқуқни муҳофаза қилувчи органлар ходимлари томонидан пойтахтда чет эл ва республика фуқароларига шаҳвоний хизмат кўрсатувчи уюшган жиноий гуруҳларни аниқлаб, уларнинг жиноий фаолиятига чек қўйиш мақсадида махсус рейд тадбирлари ўтказилган.
Аниқланишича, 32 ёшли Ҳулкар исмли аёл бир неча йиллардан буён ноқонуний моддий даромад топиш мақсадида фоҳишахона сақлаш, қўшмачилик қилиш фаолияти билан шуғулланиб, уюшган жиноий гуруҳга ўзи раҳнамолик қилиб, Тошкент шаҳридан бир нечта хонадон сотиб олиб, хонадоннинг айримларига 3-4 нафар фоҳишаларни жойлаштириб, қолган хонадонларни ўзи билан муқаддам фоҳишалик билан шуғулланган аёлларга ижарага берган.
Дастлабки тергов ҳужжатларига кўра, аёл Ашраф исмли турмуш ўртоғи ва яна икки нафар шахс билан ушбу фоҳишахоналар фаолиятини мунтазам равишда кузатиб, ҳар бир хонадоннинг ижараси учун 400-600 долларгача ойлик ижара пулларини олган, бундан ташқари «тунги капалаклар»ни йўқлагани келган ҳар бир мижоздан олган пулларни ўзаро тенг тақсимлашга келишиб, уларнинг мониторингини хонадонларга ўрнатилган видеокузатув камералар ёрдамида мижозлар сони ҳамда уларнинг хизмат кўрсатиш вақтини кузатиб борадиган навбатчилар ёлланган.
Бундан ташқари фоҳишалар гуруҳ-гуруҳга бўлиниб, уларга тушган пулларни йиғиб келиш учун махсус назоратчи бириктирган. Миразим исмли шахс масъул бўлиб, кунлик тушган пулларни уюшган гуруҳ раҳбарига олиб келганлиги ҳамда махсус ҳисобот дафтари юритилганлиги аниқланган. Қизларни ижтимоий тармоқларда реклама қилиб, уларнинг анкеталарини жойлаштириш бўйича иш штати ҳам мавжуд бўлган.
Тезкор тадбир натижасида бир нечта уйларда ўтказилган тинтув жараёнида уяли телефон аппаратлари, планшет, кузатув камералари, электрон йиғиш қурилмалари, «Регопен» дори воситалари, қайд этиш дафтари, шахсий интим воситаси, шунингдекб 1120 доллар ва 5 миллион 130 минг сўм қийматидаги пуллар аниқланиб, холислар иштирокида расмийлаштириб олинган.
Ҳолат юзасидан Тошкент вилояти ИИББ ҳузуридаги Тергов бошқармаси томонидан Ҳулкар, Ашраф, Миразим ва Элбек исмли шахсларга нисбатан Жиноят кодексининг 131-моддаси 4-қисми «б» банди билан жиноят иши қўзғатилиб, улар гумон қилинувчи тариқасида жалб қилинган ва процессуал тартибда ушланиб, Жиноят кодексининг 131-моддаси 4-қисми «б, в» бандлари (такроран, уюшган гуруҳ томонидан ёки унинг манфаатларини кўзлаб қўшмачилик қилиш ёки фоҳишахона сақлаш) ва 135-моддаси 3-қисми «г» банди (уюшган гуруҳ томонидан ёки унинг манфаатларини кўзлаб содир этилган одам савдоси) билан айб эълон қилиниб, ҳар бирига қамоққа олиш тарзидаги эҳтиёт чораси қўлланилган.
Ҳозирда жиноят иши бўйича дастлабки тергов олиб борилмоқда.
