Buxoro viloyatining Buxoro shahrida yashovchi 41 yoshli fuqaro Go‘zal Berdiyeva (barcha ism-familiyalar o‘zgartirilgan) 50 ming so‘m evaziga qo‘shmachilik qildi. Bu haqda “Daryo”ga viloyat IIB axborot xizmati rahbari Quvvat Yarashov ma’lum qildi.
Ta’kidlanishicha, Buxoro shahrining Mustaqillik ko‘chasidagi ko‘p qavatli uylarning birida vaqtincha ijarada yashab kelgan Go‘zal Berdiyeva doimiy ravishda uyiga odam chaqirib, qo‘ni-qo‘shnilarining tinchini buzib kelgan.
Buxoro shahar 3-son IIB profilaktika inspektorlari va PPX xodimi tomonidan o‘tkazilgan “Oriyat” profilaktika tadbiri davomida aniqlanishicha, u ijara uyida fuqarolarning jinsiy aloqa qilishi uchun sharoit yaratib bergan. Va evaziga 50 ming so‘m xizmat haqi olgan.
Mazkur holat yuzasidan Go‘zal Berdiyevaga Jinoyat kodeksining 131-moddasi (Qo‘shmachilik qilish yoki fohishaxona saqlash) 2-qismi bilan jinoyat ishi qo‘zg‘atilgan.
Ta’kidlash lozim, mazkur modda bilan ayblangan fuqaroning aybi o‘z tasdig‘ini topsa, u bazaviy hisoblash miqdorining yetmish besh baravaridan yuz baravarigacha miqdorda jarimaga tortilishi yoxud ozodligi uch yildan besh yilgacha cheklanishi yoki uch yildan besh yilgacha ozodlikdan mahrum qilinishi mumkin.
