Toshkentda shahvoniy xizmatlar ko‘rsatish bilan shug‘ullanib kelgan yirik uyushgan jinoiy guruh qo‘lga olindi. Bu haqda IIV Tergov departamenti xabar berdi.
Qayd etilishicha, sentabr oyida Toshkent viloyati IIBB va boshqa huquqni muhofaza qiluvchi organlar xodimlari tomonidan poytaxtda chet el va respublika fuqarolariga shahvoniy xizmat ko‘rsatuvchi uyushgan jinoiy guruhlarni aniqlab, ularning jinoiy faoliyatiga chek qo‘yish maqsadida maxsus reyd tadbirlari o‘tkazilgan.
Aniqlanishicha, 32 yoshli Hulkar ismli ayol bir necha yillardan buyon noqonuniy moddiy daromad topish maqsadida fohishaxona saqlash, qo‘shmachilik qilish faoliyati bilan shug‘ullanib, uyushgan jinoiy guruhga o‘zi rahnamolik qilib, Toshkent shahridan bir nechta xonadon sotib olib, xonadonning ayrimlariga 3-4 nafar fohishalarni joylashtirib, qolgan xonadonlarni o‘zi bilan muqaddam fohishalik bilan shug‘ullangan ayollarga ijaraga bergan.
Dastlabki tergov hujjatlariga ko‘ra, ayol Ashraf ismli turmush o‘rtog‘i va yana ikki nafar shaxs bilan ushbu fohishaxonalar faoliyatini muntazam ravishda kuzatib, har bir xonadonning ijarasi uchun 400-600 dollargacha oylik ijara pullarini olgan, bundan tashqari “tungi kapalaklar”ni yo‘qlagani kelgan har bir mijozdan olgan pullarni o‘zaro teng taqsimlashga kelishib, ularning monitoringini xonadonlarga o‘rnatilgan videokuzatuv kameralar yordamida mijozlar soni hamda ularning xizmat ko‘rsatish vaqtini kuzatib boradigan navbatchilar yollangan.
Bundan tashqari fohishalar guruh-guruhga bo‘linib, ularga tushgan pullarni yig‘ib kelish uchun maxsus nazoratchi biriktirgan. Mirazim ismli shaxs mas’ul bo‘lib, kunlik tushgan pullarni uyushgan guruh rahbariga olib kelganligi hamda maxsus hisobot daftari yuritilganligi aniqlangan. Qizlarni ijtimoiy tarmoqlarda reklama qilib, ularning anketalarini joylashtirish bo‘yicha ish shtati ham mavjud bo‘lgan.
Tezkor tadbir natijasida bir nechta uylarda o‘tkazilgan tintuv jarayonida uyali telefon apparatlari, planshet, kuzatuv kameralari, elektron yig‘ish qurilmalari, “Regopen” dori vositalari, qayd etish daftari, shaxsiy intim vositasi, shuningdekб 1120 dollar va 5 million 130 ming so‘m qiymatidagi pullar aniqlanib, xolislar ishtirokida rasmiylashtirib olingan.
Holat yuzasidan Toshkent viloyati IIBB huzuridagi Tergov boshqarmasi tomonidan Hulkar, Ashraf, Mirazim va Elbek ismli shaxslarga nisbatan Jinoyat kodeksining 131-moddasi 4-qismi “b” bandi bilan jinoyat ishi qo‘zg‘atilib, ular gumon qilinuvchi tariqasida jalb qilingan va protsessual tartibda ushlanib, Jinoyat kodeksining 131-moddasi 4-qismi “b, v” bandlari (takroran, uyushgan guruh tomonidan yoki uning manfaatlarini ko‘zlab qo‘shmachilik qilish yoki fohishaxona saqlash) va 135-moddasi 3-qismi “g” bandi (uyushgan guruh tomonidan yoki uning manfaatlarini ko‘zlab sodir etilgan odam savdosi) bilan ayb e’lon qilinib, har biriga qamoqqa olish tarzidagi ehtiyot chorasi qo‘llanilgan.
Hozirda jinoyat ishi bo‘yicha dastlabki tergov olib borilmoqda.
Izoh (0)