Тошкентда кучли қор ёғган 18 ноябрда камида 94 та ЙТҲ қайд этилди

Тошкент шаҳрида 18 ноябрь куни камида 94 та йўл-транспорт ҳодисаси қайд этилди. Бу ҳақда Тошкент шаҳар Ички ишлар бош бошқармаси хабар берди.

Тошкент шаҳар ИИББ Йўл ҳаракати хавфсизлиги бошқармаси томонидан тақдим этилган маълумотларга кўра, пойтахтда кучли қор ёғган 18 ноябрда жами 2395 та йўл ҳаракати қоидаларини бузиш ҳолати аниқланган, шундан 94 та кичик тўқнашув (ЙТҲ) содир бўлган.

Шунингдек, 18 ноябрда Тошкент шаҳрида спиртли ичимлик таъсири остида автомобиль бошқариш билан боғлиқ 13 та, светофорнинг тақиқловчи белгисини менсимаслик бўйича 129 та, зарур ҳужжатларсиз автомобиль бошқариш бўйича 169 та ҳолат қайд этилган.

Бундан ташқари, 105 та ҳолатда қувиб ўтиш қоидалари бузилган, 8 та ҳолатда ЙҲХБ ходимининг талабига бўйсунмаслик содир этилган. Телефондан ёки видеомонитордан фойдаланиш бўйича 27 та, тегишли ҳужжатларсиз ойналарни қорайтириш бўйича 9 та, қалбаки, ўзгартирилган ёки бегона давлат рақамини тақиш бўйича 1 та, тротуар ва пиёдалар йўлаклари бўйлаб ҳаракатланиш бўйича 25 та ҳолат рўйхатга олинган. 9 та ҳолатда тўхташ ва тўхтаб туриш қоидалари бузилган. 102 та ҳолатда пиёдалар томонидан йўл ҳаракати қоидалари бузилган.