Наманганда огоҳлантирилган бўлишига қарамасдан, ўзга аёл билан яшаб келган ОИВ инфекциясига чалинган 25 ёшли эркакка нисбатан жиноят иши қўзғатилди. Бу ҳақда вилояти ИИБ ахборот хизмати хабар берди.
Маълумотларга кўра, 9 ноябрь куни ИИБ ЖҚБ Гиёҳванд моддалар билан қонунга хилоф равишда муомала қилишга қарши курашиш бўлими ОИВ инфекцияси тарқалишига қарши курашиш гуруҳи вакили томонидан Наманган вилояти ОИТСга қарши курашиш марказида ҳисобида турган Уйчи туманида яшовчи 25 ёшли фуқаро ушланган. Унга ҳаёти давомида донор сифатида қон топширмаслиги, турмуш ўртоғидан бошқа аёллар билан жинсий алоқада бўлмаслиги бўйича тушунтириш ишлари олиб борилган бўлса-да, у ушбу талабларга риоя қилмаган.
Хусусан, октябрь ойи бошидан 3 ноябрь кунигача Учқўрғон туманида яшовчи, 2002 йилда туғилган аёл билан Наманган шаҳрида яшаб, у билан жинсий алоқада бўлиб келган. Уни ОИВ касаллигини юқтириш хавфи остида қолдирган.
Ушбу ҳолат бўйича шаҳар ИИО ФМБ ҳузуридаги Тергов бўлинмаси томонидан 16 ноябрь куни Жиноят кодексининг 113-моддаси (таносил ёки ОИВ касаллиги/ОИТСни тарқатиш) 4-қисми билан жиноят иши қўзғатилган.
Аввалроқ Наманганда ОИТСга чалинганини била туриб, эркаклар билан ишқий муносабатда бўлган аёлга жиноий иш қўзғатилмагани, Бухорода эса ОИВ инфекциясини ўзига таниш аёлга юқтирган эркакка жиноят иши қўзғатилгани тўғрисида хабар берилганди.
Изоҳ (0)