Ўзбекистонда изғирин совуқ келаси ҳафта бошигача сақланиб қолади

«Ўзгидромет» синоптиклари 18 ноябрь куни кузатилган об-ҳаво ҳақида изоҳ берди, деб хабар бермоқда «Gazeta.uz». Мамлакатга қор ва аёзни Урал ҳудудларидан келган совуқ антициклон олиб келди.

Ўзбекистон ҳудудининг катта қисмида, асосан, қор шаклидаги ёғингарчилик бўлиб ўтди. Тоғли ҳудудларнинг айрим жойларида қор нисбатан кучли ёғди. Мамлакатнинг фақатгина шимоли-ғарбий ҳудуди ва чўл зонасида ёғингарчилик кузатилмади.

Қайд этилишича, қор ёғган пайтда 50−100 метргача бўлган жойларда кўриш даражаси ёмонлашди. Йўлларни муз қоплади.

Кечга яқин мамлакатнинг марказий ва шарқий минтақаларида баландлиги 6-14 сантиметр, баъзи жойларда эса 20−25 сантиметргача бўлган қор қоплами шаклланди. Қор қоплами илгари шаклланган тоғли ҳудудларда қор қалинлиги 10−30 сантиметрга етди.

Кун давомида ҳаво ҳарорати 5−3 даража совуқдан ошмади. Кечаси деярли ҳамма жойда ёғингарчилик тўхтади, аёз эса кучайди.

Тошкентда ҳарорат 9 даражагача совуққа тушиб кетди. Мамлакатнинг баъзи жойларида 13−10 даражага совуқ, шимолда ва чўл зонасида 18−15 даража совуқ қайд этилган. Синоптикларнинг таъкидлашича, бу ҳарорат ўртача йиллик кўрсаткичдан 10−15 даражага паст.

«Ўзгидромет»нинг таъкидлашича, умуман олганда, ноябрь ойининг иккинчи ярмида Ўзбекистонда қор ёғиши камёб ҳолат эмас. Ёмғирдан қорга ўтиш ва беқарор қор қопламининг шаклланиши ўтган йили ҳам қайд этилган ва 2016 йилда деярли шу йилги санада қор ёғган. Бироқ синоптикларнинг таъкидлашича, бу даврда бундай паст ҳарорат жуда камдан кам кузатилади.

Бугун ҳаво ҳарорати 5−2 даража совуқни ташкил этмоқда. Ўзбекистон ҳудуди бўйлаб совуқ об-ҳаво келаси ҳафта бошига қадар давом этади. Ҳаво ҳарорати кечаси 9−6 даража совуқ, кундузи 2 даража совуқ, 3 даража илиқ атрофида бўлиши кутилмоқда.