Сурхондарёда йўлни кесиб ўтаётган икки пиёдани юк машинаси уриб кетди

Сурхондарё вилоятининг Жарқўрғон туманидаги «Дўстлик» маҳалласида юк машинаси ҳайдовчиси икки пиёдани уриб кетди, деб хабар бермоқда хабар бермоқда Repost.

Хабарда айтилишича, ҳайдовчи светофорнинг қизил чироғида тўхтаб, яшил ёнганида юришни бошлаган. Бироқ шу пайтда икки пиёда йўлни кесиб ўта бошлаган. Оқибатда пиёдалардан бири бўлган аёл Г.А. бир қатор тан жароҳатлари билан касалхонага ётқизилган, иккинчи пиёда эса жароҳатланмаган.

ЙҲХББ матбуот хизматининг маълум қилшича, воқеа 12 октябрь куни соат 14:00 ларда, Сурхондарё вилояти, Жарқўрғон тумани, «Дўстлик» маҳалласи ҳудудидан ўтувчи 4Р-102 автомобиль йўлининг 1-километрида юз берган.

26 ёшли ҳайдовчи Ж.Б. «Ман TGS 40.400» русумли юк автомашинасида светофорнинг тақиқловчи қизил чироғида тўхтаб, яшил чироғида ҳаракатланган вақтида, йўлнинг ўнг томонидан чап томонига, белгиланмаган жойдан кесиб ўтаётган 55 ёшли аёл Г.А.ни уриб юборган. Оқибатда аёл оғир тан жароҳатлари олиб шифохонада вафот этган.

Мазкур ҳолат юзасидан Жарқўрғон тумани ИИБ ҳузуридаги ТБ томонидан  Жиноят Кодексининг 266-моддаси 2-қисми (одам ўлимига олиб келган транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилиб, ҳозирда тергов ҳаракатлари олиб борилмоқда.

Хабарда қўшимча қилинишича, ҳайдовчи Ж.Б. бир йил мобайнида икки маротаба қоидабузарлик содир этган.

Аввалроқ Ўзбекистонда 2020 йил январь ойидан сентябрь ойигача 4294 та йўл-транспорт ҳодисаси содир бўлгани хабар берилган эди. ЙТҲларнинг 1919 таси пиёдалар, 728 таси болалар, 579 таси велосипедчилар, 77 таси мотоциклчилар, 146 таси такси ҳайдовчилари билан содир бўлган. 17,8 фоиз ҳолатда авариялар пиёдаларнинг кўчани нотўғри жойидан кесиб ўтиши оқибатида юз берган.