Навоий вилоятининг Хатирчи туманида содир бўлган ЙТҲда икки киши вафот этди, бир киши эса оғир аҳволда шифохонада қолмоқда. Бу ҳақда «Дарё»га вилоят ИИБ ЙҲХБ матбуот гуруҳи катта инспектори Фарруҳ Якубов хабар берди.
Таъкидланишича, 2020 йилнинг 8 октябрь куни соат 19:50 да Хатирчи тумани ҳудудидан ўтган 4К-372 автомобиль йўлининг 16-километрида ЙТҲ содир бўлган.
Тумандаги Пўлатов қишлоғидан Ибн Сино қишлоғи томонга ҳаракатланиб келаётган 27 ёшли фуқаро М.Т. ўз бошқарувидаги Ласеттиъда йўлни кесиб ўтаётган икки нафар пиёдани уриб юборган. Шунингдек, ҳайдовчи бошқарувни йўқотиб, йўлнинг ўнг томонидаги симёғочга урилган.
ЙТҲ натижасида хатирчилик фуқаролар Ш.Қ., З.Н. ҳамда ҳайдовчи М.Т. турли даражадаги оғир тан жароҳати олиб, туман шифохонасига ётқизилган.
Кўрсатилган тиббий ёрдамга қарамай ЙТҲ жабрланувчиси уч нафар фарзанднинг отаси Ш.Қ. ҳамда ҳайдовчи М.Т. вафот этган.
«Вилоят ИИБ ЙҲХБ томонидан мунтазам равишда ҳайдовчилар билан профилактик ишлар олиб борилаётганига қарамай, афсуски, автоҳалокатлар содир бўлмоқда. Ласетти ҳайдовчиси олдиндан пайдо бўлиши мумкин бўлган хавф-хатарни инобатга олмасдан тезликни оширган, оқибатда тўсатдан йўлга чиқиб қолган пиёдаларни уриб юборган. Мазкур ҳолат юзасидан эса Хатирчи тумани ИИБ томонидан Жиноят кодексининг 266-моддасининг 2-қисми (транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилди», — дейди Фарруҳ Якубов.
Эслатиб ўтамиз, Сурхондарё вилояти Бойсун туманида Lacetti ва Cobalt иштирокида содир бўлган ЙТҲда икки киши ҳалок бўлганди. Жиззахда ёритиш чироқларисиз ҳаракатланган Cobalt эса юк машинасига урилиши оқибатида бир киши ҳалок бўлгани хабар берилганди.
Изоҳ (0)