Финляндия президенти Александр Стубб Украинадаги уруш туфайли АҚШ президенти Дональд Трампнинг Россияга нисбатан сабри “тугашига” умид билдирмоқда. Бу ҳақда Финляндиянинг Ylе жамоатчилик телерадиокомпанияси хабар берган.
Стубб бу ҳақда мамлакат элчилари конференцияси арафасида Хелсинкида ўтказилган матбуот анжуманида маълум қилган.
“АҚШ президенти Дональд Трампнинг Россияга нисбатан сабр-тоқати тугашига умид қиламан. Биз барқарор тинчликка эришиш учун барча имкониятларимизни ишга соламиз. Украинанинг ўз тақдирини ўзи белгилаши ва ҳудудий яхлитлигини иложи борича сақлаб қолиши учун қўлимиздан келган барча ишни қиламиз”, деган Финляндия президенти.
Президентнинг фикрича, Владимир Путинни фақатгина Россия билан савдо қилишни давом эттираётган ёки Россия ҳарбий саноатига ёрдам бераётган давлатларга божлар жорий этиш орқали тинчлик битимини имзолашга мажбур қилиш мумкин.
“Путинни тинчлик битимини имзолашга ишонтира оладиган ягона кучлар, эҳтимол, Ғарбда эмас, Шарқда жойлашган”, дея қўшимча қилган Стубб.
25 август куни Стубб Путиннинг Украина бўйича талаблари Россиянинг одатий музокара тактикаси эканлигини ва буни амалда бажариб бўлмаслигини айтган.
18 август куни Оқ уйда АҚШ ва Украина президентлари Дональд Трамп ва Владимир Зеленскийнинг учрашуви бўлиб ўтди. Ундан сўнг Трамп Европа раҳбарларини қабул қилди.
Учрашувда Дональд Трамп Финляндия президенти Александр Стуббни танимагани, шунингдек, Европа Комиссияси раиси Урсула фон дер Ляйенни таҳқирлагани ма`лум қилинганди.
Изоҳ (0)