UzAutoMotors янги Chevrolet Tahoe High Country автомобилини Ўзбекистонга импорт қила бошлади. Бу ҳақда 26 август куни Тошкент шаҳрида ўтказилган тақдимот маросимидан “Дарё” мухбири хабар берди.
Автомобиль 6,2 литр ҳажмли двигатель, 420 от кучига эга. Саккиз сонияда 100 км/соат тезликка чиқа қолади.

Tahoe аввалгидан каттароқ — 24 дюймли ғилдираклар билан жиҳозланган. Автомобиль янгиланган радиатор панжараси, анимацион чироқлар ва панорамали том билан таъминланган. Унга автоматик равишда чиқадиган зинапоялар ва юкхона эшигини контактсиз очиш тизими ўрнатилган.
Етти ўринли салон чарм қопламали ўриндиқлар билан жиҳозланган бўлиб, уларда иситиш тизми мавжуд.
Ҳайдовчи ўриндиғи саккиз йўналишда электрон тарзда созланади, фавқулодда вазиятларда вибрацион тебранишли қайта алоқа тизими мавжуд.

Машинада 11 дюймли дисплейга эга рақамли қурилмалар панели, Head-Up проекцион дисплейи бор. Шу билан бирга, смартфонларни улаш стандартларини тўлиқ қўллаб-қувватлайдиган 17,7 дюмли (аввалгиси 8 дюмли) сенсорли экранга эга ахборот-кўнгилочар тизим ўрнатилган.
Ўз навбатида олд тўқнашув ҳақида огоҳлантириш билан автоматик фавқулодда тормозлаш функцияси, ҳаракатланиш бўлагини сақлаш тизими, мослашувчан круиз-назорати, юқори аниқликдаги атрофни кўриш камералари бор.
Сотувлар 2025 йил 11 сентябрда бошланиши режалаштирилган. Янги Chevrolet Tahoe 2025 High Country автомобили уч хил рангда савдога чиқарилади: оқ, қора, тўқ кўк. Унинг нархи 1 миллиард 464 миллион 500 минг сўмни ташкил этади. Мазкур автомобилдан йилига 250-300 дона сотиш режалаштирилган.
Изоҳ (0)