Японияда дунёдаги энг қиммат Nissan Skyline аукцион орқали 313 минг долларга сотилди

Япониядаги GT-R Registry аукциони орқали дунёдаги энг қиммат Nissan Skyline сотилди. 2002 йилда ишлаб чиқарилган спорткар 313 400 долларга баҳоланган, деб хабар беради Motor.

Nissan Skyline GT-R M-Spec Nür R34 кузовининг сўнгги модификацияларидан бири ҳисобланади. Спорткар ўз номини Германиядаги Нюрбургринг пойга трассаси шарафига олган. 2002 йилда конвейердан жами 285 та шу турдаги нусха ишлаб чиқарилган. Мазкур «Скайлайн» сериянинг 63-сонли нусхаси ҳисобланади.

Nissan Skyline GT-R M-Spec Nür модели Millenium Jade тўқ кул рангига бўялган. Модель бошқа «Скайлайн»лардан 334 от кучини тақдим этишга қодир модификацияга учраган двигатели билан ажралиб туради. Агрегат механик узатмалар қутиси билан биргаликда ишлайди. Спорткар соатига 100 километрга 4,9 сонияда эриша олади, максимал тезлиги эса — 282 км/соат. Одометрга кўра, автомобиль ҳозирга қадар 6817 километр йўл босган.

Машина цилиндрлар блоки каллакчаси тилладан ишлангани, шунингдек, VIN-рақами туширилган пештахтага тилла суви юритилгани билан ҳам ажралиб туради.

Савдолар вақтида Nissan Skyline 313 400 долларга сотилган бўлиб, у модель тарихидаги энг қиммат автомобилга айланган. Бундан олдинги рекордни 2018 йилда 300 минг долларга сотилган «Скайлайн» ўрнатган эди.