Navoiyda sodir bo‘lgan YTHda piyoda bilan birga haydovchi ham vafot etdi

Navoiy viloyatining Xatirchi tumanida sodir bo‘lgan YTHda ikki kishi vafot etdi, bir kishi esa og‘ir ahvolda shifoxonada qolmoqda. Bu haqda “Daryo”ga viloyat IIB YHXB matbuot guruhi katta inspektori Farruh Yakubov xabar berdi.

Ta’kidlanishicha, 2020-yilning 8-oktabr kuni soat 19:50 da Xatirchi tumani hududidan o‘tgan 4K-372 avtomobil yo‘lining 16-kilometrida YTH sodir bo‘lgan.

Tumandagi Po‘latov qishlog‘idan Ibn Sino qishlog‘i tomonga harakatlanib kelayotgan 27 yoshli fuqaro M.T. o‘z boshqaruvidagi Lasetti’da yo‘lni kesib o‘tayotgan ikki nafar piyodani urib yuborgan. Shuningdek, haydovchi boshqaruvni yo‘qotib, yo‘lning o‘ng tomonidagi simyog‘ochga urilgan.

YTH natijasida xatirchilik fuqarolar Sh.Q., Z.N. hamda haydovchi M.T. turli darajadagi og‘ir tan jarohati olib, tuman shifoxonasiga yotqizilgan.

Ko‘rsatilgan tibbiy yordamga qaramay YTH jabrlanuvchisi uch nafar farzandning otasi Sh.Q. hamda haydovchi M.T. vafot etgan.

“Viloyat IIB YHXB tomonidan muntazam ravishda haydovchilar bilan profilaktik ishlar olib borilayotganiga qaramay, afsuski, avtohalokatlar sodir bo‘lmoqda. Lasetti haydovchisi oldindan paydo bo‘lishi mumkin bo‘lgan xavf-xatarni inobatga olmasdan tezlikni oshirgan, oqibatda to‘satdan yo‘lga chiqib qolgan piyodalarni urib yuborgan. Mazkur holat yuzasidan esa Xatirchi tumani IIB tomonidan Jinoyat kodeksining 266-moddasining 2-qismi (transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qo‘zg‘atildi”, — deydi Farruh Yakubov.

Eslatib o‘tamiz, Surxondaryo viloyati Boysun tumanida Lacetti va Cobalt ishtirokida sodir bo‘lgan YTHda ikki kishi halok bo‘lgandi. Jizzaxda yoritish chiroqlarisiz harakatlangan Cobalt esa yuk mashinasiga urilishi oqibatida bir kishi halok bo‘lgani xabar berilgandi.