Surxondaryoda yo‘lni kesib o‘tayotgan ikki piyodani yuk mashinasi urib ketdi

Surxondaryo viloyatining Jarqo‘rg‘on tumanidagi “Do‘stlik” mahallasida yuk mashinasi haydovchisi ikki piyodani urib ketdi, deb xabar bermoqda xabar bermoqda Repost.

Xabarda aytilishicha, haydovchi svetoforning qizil chirog‘ida to‘xtab, yashil yonganida yurishni boshlagan. Biroq shu paytda ikki piyoda yo‘lni kesib o‘ta boshlagan. Oqibatda piyodalardan biri bo‘lgan ayol G.A. bir qator tan jarohatlari bilan kasalxonaga yotqizilgan, ikkinchi piyoda esa jarohatlanmagan.

YHXBB matbuot xizmatining ma’lum qilshicha, voqea 12-oktabr kuni soat 14:00 larda, Surxondaryo viloyati, Jarqo‘rg‘on tumani, “Do‘stlik” mahallasi hududidan o‘tuvchi 4R-102 avtomobil yo‘lining 1-kilometrida yuz bergan.

26 yoshli haydovchi J.B. “Man TGS 40.400” rusumli yuk avtomashinasida svetoforning taqiqlovchi qizil chirog‘ida to‘xtab, yashil chirog‘ida harakatlangan vaqtida, yo‘lning o‘ng tomonidan chap tomoniga, belgilanmagan joydan kesib o‘tayotgan 55 yoshli ayol G.A.ni urib yuborgan. Oqibatda ayol og‘ir tan jarohatlari olib shifoxonada vafot etgan.

Mazkur holat yuzasidan Jarqo‘rg‘on tumani IIB huzuridagi TB tomonidan  Jinoyat Kodeksining 266-moddasi 2-qismi (odam o‘limiga olib kelgan transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qo‘zg‘atilib, hozirda tergov harakatlari olib borilmoqda.

Xabarda qo‘shimcha qilinishicha, haydovchi J.B. bir yil mobaynida ikki marotaba qoidabuzarlik sodir etgan.

Avvalroq O‘zbekistonda 2020-yil yanvar oyidan sentabr oyigacha 4294 ta yo‘l-transport hodisasi sodir bo‘lgani xabar berilgan edi. YTHlarning 1919 tasi piyodalar, 728 tasi bolalar, 579 tasi velosipedchilar, 77 tasi mototsiklchilar, 146 tasi taksi haydovchilari bilan sodir bo‘lgan. 17,8 foiz holatda avariyalar piyodalarning ko‘chani noto‘g‘ri joyidan kesib o‘tishi oqibatida yuz bergan.