Боливия президентлигига номзод Хорхе Кирога сайловларда ғалаба қозонган тақдирда Россия ва Хитой билан литий ресурсларини ўзлаштириш бўйича тузилган йирик шартномаларни бекор қилишни режалаштирмоқда. Бу ҳақда Франциянинг Agence France-Presse ахборот агентлиги хабар берди.

“Кирога кетаётган ҳукумат Россия ва Хитой билан литий ресурсларини ўзлаштириш бўйича имзолаган миллиардлаб долларлик битимларни бекор қилишни ваъда қилди”, дея унинг сўзларини келтирмоқда агентлик.
Бундан ташқари, у Боливия иқтисодий моделини тубдан ислоҳ қилиш ниятини билдирди. Бу ислоҳотлар давлат харажатларини кескин қисқартиришни ўз ичига олади.
Боливия дунёдаги энг йирик литий захираларига эга бўлиб, улар тахминан 23 миллион тоннага баҳоланади ва бу дунёдаги ушбу металл ресурсларининг 20 фоизини ташкил этади. Мамлакатдаги литий Аргентина ва Чили билан биргаликда Литий учбурчагига кирувчи Салар-де-Уюни шўрхоклигида тўпланган.
Айни пайтда мамлакат Россия ва Хитой кампаниялари билан литий карбонат ишлаб чиқариш заводларини қуриш бўйича шартномалар тузиб, уни саноат миқёсида ишлаб чиқариш лойиҳаларини фаол ривожлантирмоқда.
Хорхе Кирога Боливияда 19 октябрга белгиланган президентлик сайловларининг иккинчи босқичига ўтган. 17 август куни бўлиб ўтган биринчи турда у 26,7 фоиз овоз билан иккинчи ўринни эгаллаган. Биринчи ўринда эса 32 фоиз овоз тўплаган сенатор Родриго Пас ғолиб бўлган.
Изоҳ (0)