Дональд Трамп АҚШ Федерал захира тизими бошқарув кенгаши аъзоси Лиза Кукни ишдан бўшатаётганини маълум қилди. У бу ҳақда Truth Social ижтимоий тармоғида эълон қилинган хати орқали билдирган.
Хатда Трамп Кукни ишдан бўшатиш учун етарли асослар мавжудлигини билдирган. У бир нечта ипотека кредитлари ҳақида ёлғон маълумот берган бўлиши мумкин.
Федерал агентлик директори Билл Пульта илгари сурган айбловларга кўра, Кук икки хил штатда жойлашган иккита турар жойни бир вақтнинг ўзида асосий яшаш манзили сифатида кўрсатган. Бу эса амалда имконсиз. Трамп Америка халқи Федерал Резервнинг ҳалоллигига ишониши кераклигини таъкидлаб, Лиза Кукнинг ҳалоллигига ишонмаслигини айтган.

Лиза Кукнинг ўзи президент уни муҳим сабаб билан ишдан олаётганини эшитиб, унинг бундай ваколати йўқлигини айтган.
“Президент Трамп мени гўёки ъмуҳим сабабъ билан ишдан бўшатган эмиш, бироқ қонунда бундай сабаб мавжуд эмас ва унинг бунга ваколати йўқ. 2022 йилдан бери қилаётганимдек, Америка иқтисодиётига ёрдам беришда давом этаман”, деган Федерал Резерв кенгаши аъзоси.
Bloomberg нашрининг ёзишича, АҚШда ҳеч қачон президент Федерал Резерв кенгаши аъзосини ишдан бўшатмаган. Бироқ қонунда президент муҳим сабаб билан кенгаш аъзосини ишдан олиши мумкинлиги ёзилган. Айнан қайси сабаб муҳимлиги эса айтилмаган. Бу баъзида хизмат вазифасини бузиш ёки мажбуриятларини бажармасликни англатади.
Жо Байден 2022 йили Лиза Кукни Федерал Резерв кенгаши аъзолигига тайинлаган. У кенгашга тайинланган илк қора танли аёл бўлган. Кукнинг Резервдаги ваколат муддати 2038 йилда тугайди.
Bloomberg нашрининг хулосасига кўра, Дональд Трамп Лиза Кукни муддатидан олдин ишдан бўшаца, Федерал Резерв бошқарув кенгашида ўзининг тарафдорларини биттага кўпайтириш имконияти бўлади.
Изоҳ (0)