Rolls-Royce компанияси келажак автомобили дизайнини яратиш бўйича бутун дунё болалари ўртасида ўтказилган танлов ғолибларини эълон қилди. Бунда асосий йўналишлар бўйича 6 ёшдан 16 ёшгача бўлган болалар ғолиб бўлди. Бундан ташқари, россиялик қиз ҳам ҳакамлар ҳайъатининг махсус мукофотига лойиқ кўрилган, деб ёзади Motor.
Танловни ўтказишдан мақсад 16 ёшгача бўлган болаларга изоляция шароитида ўз иқтидорини намойиш этишга ёрдам беришдан иборат. Онлайн тадбирда дунёнинг 80 та мамлакатидан беш мингдан ортиқ бола иштирок этган. Танлов бирор қоида ёки талаб билан чекланмаган.
Танлов асосий тўрт йўналишга бўлинган: «Технология», «Экология», «Фантазия» ва «Кўнгилочар». Япония, Франция, Хитой ва Венгриядан бўлган болалар мазкур йўналишлар бўйича ғолибликни қўлга киритган. Мукофот сифатида болаларга энг яқин дўсти билан Rolls-Royce автомобилида мактабга бориш имконияти тақдим этилган. Бундан ташқари, Rolls-Royce дизайнерлари ғолиблар ишини профессионал дастурий таъминот ёрдамида ёрқин иллюстрацияга айлантирган.
Асосий йўналишлардан ташқари, ҳакамлар ҳайъатининг махсус мукофоти ҳам бор бўлиб, у Санкт-Петербургда истиқомат қилувчи 6 ёшли Алисага насиб этган. Ёш ижодкор океан ва тоғлар узра учишга мўлжалланган ва, шу билан бирга, ўз қулайлигини сақлаб қолувчи келажак Rolls-Royce концептини яратган.
Қуёшдан энергия олиб ҳаракатланувчи автомобиль кузовидан яшил боғ ўрин олган. Бундан ташқари, Алисанинг ғоясига кўра, келажакда Rolls-Royce автомобиллари дунёдаги барча тилларни таржима қила олади, ҳайвонлар ва қушлар тилини тушунади. Алиса ҳам карантин чоралари юмшатилгач энг яқин дўсти билан шахсий ҳайдовчига эга Rolls-Royce’да мактабга бориши мумкин.
Изоҳ (0)