Молиявий жиноятлар туфайли ижтимоий ривожланишга сарфланиши мумкин бўлган 100 миллиардлаб доллар йўқотилмоқда — БМТ

Маблағларнинг ноқонуний олиб чиқиб кетилиши туфайли ҳукуматлар ҳар йили ижтимоий ривожланишга сарфланиши мумкин бўлган 500 миллиард доллар йўқотмоқда, деб хабар бермоқда «Gazeta.uz» БМТ матбуот хизматига таяниб.

Қайд этилишича, дунёда ҳар йили 1,6 триллион доллар маблағ «ювилади». Бу дунё ЯИМнинг 2,7 фоизини ташкил этади. Яна триллион доллар оффшорларда жойлашган. Бундай маълумотлар ноқонуний олиб чиқиб кетилган активларни қайтариш ва уларни барқарор ривожланиш мақсадларига эришиш бўйича лойиҳаларга сарфлаш масалалари билан шуғулланадиган юқори даражадаги гуруҳнинг оралиқ ҳисоботида келтирилган. Гуруҳ БМТ Бош ассамблеяси ва БМТнинг Иқтисодий ва ижтимоий кенгаши ҳомийлигида 2020 йил январь ойида ташкил этилган.

БМТ экспертларининг таъкидлашича, мамлакатлар расмийлари коррупция, чет элга ноқонуний пул ўтказиш ва бошқа молиявий ҳуқуқбузарликларга қарши қатъийроқ курашишлари лозим. Бундай чоралар туфайли ҳукуматлар катта миқдордаги маблағларни сақлаб қолиб, уни ижтимоий ва иқтисодий ривожланишга сарфлашлари мумкин бўлади.

«Дунёда коррупция ва солиқларни тўлашдан бўйин товлаш авж олмоқда. Кўплаб банклар ўзаро тил бириктирган, аксарият ҳукуматлар ўтмишда қотиб қолган. Барчамизни ўғирлашмоқда, биринчи навбатда — дунёнинг муҳтож қатламини», — деган Литва собиқ президенти ва гуруҳ вакили Даля Грибаускайте.

Мутахассислар АҚШ Молия вазирлигининг жиноий пулларни легаллаштириш ва терроризмни молиялаштиришга қарши кураш билан шуғулланувчи бўлими — FinCEN томонидан яқинда олинган банк ҳисоботларини ўрганиш натижалари эслатиб ўтилган.

ОАВлар хабарига кўра, йирик банклар жиноятчиларга «ҳаром» пулларни дунё бўйлаб ўтказишга рухсат берган. Транзакция қилинган бундай пулларнинг миқдори 2 триллион долларни ташкил этган.

Гуруҳ ҳисоботида, шунингдек, кўплаб ҳуқуқбузарлар коронавирус пандемияси атрофидаги вазиятдан фойдаланиб қолгани қайд этилган. Ҳукуматлар аҳолига ижтимоий ёрдам кўрсатишни осонлаштириш ва иқтисодиётни ривожлантириш чораларини кўриш учун молиявий назоратни юмшатганди.

«COVID-19 пандемияси коррупция ва молиявий жиноятларга қарши туришга қодир эмаслигимизни яна бир бор эслатди. Касаллик тарқалишига қарши кураш, ҳаётни сақлаб қолиш ва ёрдам кўрсатишга ажратилган ресурслар коррупция ва қонунбузарлик туфайли йўқолмоқда», — деган Нигернинг собиқ бош вазири ва гуруҳнинг ҳамраиси Иброҳим Маяки.