Трамп АҚШда коронавирусга қарши вакцинация қачон бошланишини маълум қилди

АҚШ президенти Дональд Трамп Оқ уйда ўтказилган матбуот анжумани вақтида коронавирусга қарши вакцинанинг мамлакат аҳолиси ўртасида кенг тарқатиш октябрь ойидан бошланишини маълум қилди, деб хабар беради CNBC.

«Биз вакцинани хавфсиз ва самарали тарзда тақсимлаш ҳамда етказиб бериш йўлидамиз. Ўйлашимизча, буни тахминан октябрда бошлашимиз мумкин», — дейди Америка етакчиси.

Трампнинг аниқлик киритишича, бу октябрь ўрталарида ёки бироз кейинроқ бўлиши ҳам мумкин. Шунингдек, у АҚШда вакцинанинг омадсиз якунланиши ушбу муддатнинг яна чўзилишига олиб келишини қўшимча қилган.

АҚШ Соғлиқни сақлаш ва ижтимоий хизматлар вазирлиги қошидаги Касалликлар профилактикаси ва назорати маркази директори Роберт Редлифнинг COVID-19’га қарши вакцинадан мамлакат аҳолиси фақатгина 2021 йилнинг иккинчи ярмидан фойдаланиши мумкинлиги тўғрисидаги фикрни Трамп хато деб атаган.

«Ўйлашимча, у хато айтган. Бу шунчаки нотўғри маълумот. Унга қўнғироқ қилдим ва у менга бу ҳақида ҳеч нарса демади», — дейди Трамп.

Аввалроқ Жаҳон соғлиқни сақлаш ташкилотининг Европа минтақаси бўйича директори Ҳанс Клюге коронавирусга қарши яратиладиган бўлажак вакцина пандемияга чек қўя олмаслиги ва аҳолининг барча қатлами учун бирдек самарали бўлмаслигини маълум қилгани тўғрисида хабар берилганди.

Эслатиб ўтамиз, август охирларида Россия ва Қозоғистон ўртасида «Спутник V» вакцинасини етказиб бериш тўғрисида битим имзолангани, Россияда грипп ва коронавирусга қарши ягона вакцина яратилаётгани, «Роспотребнадзор»нинг «Вектор» давлат илмий маркази томонидан ишлаб чиқилган коронавирус инфекциясига қарши иккинчи вакцинанинг клиник синовлари иккинчи босқичи якунига етказилиши билан гувоҳномага эга бўлиши мумкинлиги ҳақида хабарлар берилганди. Бир неча кун олдин Британия—Швециянинг AstraZeneca компанияси томонидан яратилган коронавирусга қарши вакцина синовлари беморларнинг бирида иккиламчи таъсир пайдо бўлгани сабаб тўхтатилган эди.