2011 йилда 77 кишини ўлдиргани учун 21 йилга озодликдан маҳрум этилган норвегиялик Андерс Брейвик шартли равишда озод қилиниш тўғрисида илтимоснома билан мурожаат қилди. Бу ҳақда унинг адвокати Ойстен Стуррвикка таяниб, Verdens Gang таблоиди хабар берди.
Илтимосномага иккита исм остида имзо чекилган: Андерс Беринг Брейвик ва Фьотольф Хансен (маҳкум иккинчи исмни 2017 йилда олган).
Адвокатнинг сўзларига кўра, муддатидан олдин озодликка чиқарилишини сўраш ҳуқуқи Брейвикда қамалганидан 10 йил ўтибгина пайдо бўлади. Шу билан бирга, террорчи ҳозирга қадар ундан ҳам камроқ қамоқ жазосини ўтаган — у 2011 йилнинг июлида ҳибсга олинган, ҳукм эса 2012 йилнинг августида ўқилган. «У буни ҳозир хоҳлаяпти. У суд якунланганидан бери ёлғиз камерада саккиз йилдан ортиқ ўтирди», — дейди адвокат.
Шунингдек, Брейвик ўз ҳуқуқлари бузилаётгани сабаб давлатга қарши янги суд жараёнини бошлаш ниятида. 2015 йилда у давлат билан судлашиб, қамоқдаги ҳуқуқлари бузилаётганидан шикоят қилганди. Брейвикнинг айтишича, уни қамоқда сақлаш шароити ғайриинсоний бўлиб, унинг ғурурини топтамоқда. 2016 йилнинг апрелида Осло шаҳридаги округ суди шикоятни қисман асосли деб топиб, маҳбусга компенсация тўланишини белгилаган. Бироқ 2017 йилнинг мартида Боргартинг апелляция суди ҳукмни бекор қилган. Суд Брейвикнинг бир кишилик камерада сақланишини маъқуллаган, негаки маҳбус қилмишидан афсусланмаслигини айтган, демак, у ҳануз жамият учун хавф туғдириши мумкин. Кейинроқ 2017 йилда Норвегия Олий суди террорчининг қамоқхонадаги яшаш шароитлари устидан қилган шикоятини асоссиз, деб топган.
Эслатиб ўтамиз, 2011 йил 22 июль куни норвегиялик маҳбус иккита терактни амалга оширган. Дастлаб у Осло ҳукумати жойлашган даҳада портлаш содир этган, натижада 8 киши ҳалок бўлган. Кейинроқ террорчи Утойя оролида 69 кишини отиб ўлдирган. 2018 йили у ўз қилмишидан афсусда эканини маълум қилган, бироқ айримлар унинг гапларини ёлғон деб топган.
Изоҳ (0)