Дунёдаги ривожланган 13 та давлат аҳолиси АҚШ президенти Дональд Трампдан кўра кўпроқ Россия президенти Владимир Путинга ишонади. Бу Pew Research мустақил тадқиқот маркази томонидан ўтказилган сўров натижаларида маълум бўлди.
Тадқиқот Буюк Британия, Франция, Германия, Канада, Бельгия, Нидерландия, Италия, Испания, Швеция, Дания, Япония, Жанубий Корея ва Австралияда ўтказилган. Унинг иштирокчиларига дунёнинг олти нафар етакчиси — Дональд Трамп, Владимир Путин, Франция президенти Эммануэль Макрон, Германия канцлери Ангела Меркель, Британия бош вазири Борис Жонсон ва Хитой раиси Си Цзиньпинга бўлган ишонч тўғрисида савол берилган.
Социологларнинг аниқлашича, ушбу мамлакатларда истиқомат қилувчилар кўпроқ Меркелга ишонади. Бу ҳақда сўров иштирокчиларининг 76 фоизи маълум қилган. Иккинчи ўринда Макрон (64 фоиз) жойлашган бўлса, учинчи поғонани Жонсон (48 фоиз) банд этган.
Владимир Путинга респондентларнинг 23 фоизи, Си Цзиньпинга 19 фоизи, Трампга эса 16 фоизи ишонч билдирган.
Россия президентига Италия (37 фоиз) ва Германия (31 фоиз) аҳолиси кўпроқ ишонч билдиргани айтилмоқда. АҚШ президенти эса кўпроқ Япония аҳолисининг ишончини қозонган — 25 фоиз.
Сўров натижаларига кўра, Буюк Британияда сўнгги 20 йил ичида АҚШга бўлган ишонч 40 фоиздан ортиққа тушиб кетган. 2000 йилда АҚШга нисбатан британияликларнинг 83 фоизи ижобий муносабатда бўлган бўлса, эндиликда уларнинг сони — 41 фоизни ташкил этмоқда.
Изоҳ (0)