Ҳамманинг оғзида бу йилги тест синовлари ўйин бўлиб кетгани. Ҳа, стадион ўйин учун қурилган бўлса, яна нимани кутгандингиз? Ассалому алайкум. Дайжестимиздан очиқ осмон остидаги тестлар мавзуси ҳам ўрин олган.
Бу йилги Мустақиллик байрами пандемия манзарасида анча сокин ўтди. Байрам оила даврасида нишонланиб, мушакбозлик ташкил этилмади. Шавкат Мирзиёев Шаҳидлар хотираси хиёбонига ва Мустақилик майдонига борди, эзгулик монументи пойига гулчамбар қўйди. Ўзбекистон мустақиллигининг йигирма тўққиз йиллигига бағишланган тантанали маросимда нутқ сўзлаган президент «Ўзбекистонда янги бир уйғониш – учинчи Ренессанс даврига пойдевор қўйилмоқда», деб айтди.
Мустақиллик байрами билан Хитойнинг Ўзбекистондаги элчиси Цзянь Ян ва Туркиянинг Ўзбекистондаги элчиси Меҳмет Сурайёр Эр табриклади. Эътиборлиси – улар иккови ҳам ўзбек тилида табриклади. Аввалдан ўзбекчага тили келишиб қолган АҚШ элчиси Даниэль Розенблюм бу сафар ҳам ўзбекистонликларни ўзбекчалаб муборакбод қилди. Қарангки, мистер Розенблюм айни Мустақиллигимиз куни уйланган экан, тўйларининг 29 йиллиги билан аёлини ҳам табриклади.
* * *
Коронавирус юқтириш ҳолатлари, аниқроғи, уни расман қайд қилиш ҳолатлари йигирма кундан бери камаймоқда. Бироқ душманнинг биттаси ҳам кўплигини ёддан чиқармаслик лозим. Аксига олиб, «Кавасаки синдроми» деган хасталик ўзбекистонлик бир болада кузатилгани кўпчиликни ташвишга солиб қўйди. Бу синдром коронавирус таъсирида бола организмида кечадиган кучли яллиғланиш, қон-томирлар ўтказувчанлиги бузилишини келтириб чиқаради. Шунингдек, боланинг тана ҳарорати беш ва ундан ортиқ кунларда 38 даражадан юқори бўлади, танасига турли тошмалар тошади, қўллар кафти ва товон терисининг кўчиши кузатилиши мумкин.
Эҳтиёт бўлиш керак. Шунинг учун мактаблар қатъий санитария қоидаларига амал қилиши белгилаб олинди. Мактабларда дарс машғулотлари эрталаб соат 8:00 дан кеч соат 17:30 гача ташкил қилинади. Дарслар табақалаштирилган тартибда бошланади, яъни: 1–4-синфлар мактабга соат 08:00 гача, 5–8-синфлар соат 08:30 гача ҳамда 9–11-синфларнинг келиши соат 09:00 гача алоҳида эшиклардан ижтимоий масофа сақлаб, тана ҳароратини ўлчаган ҳолда амалга оширилади. Дарслар «синф системаси»да олиб борилади, яъни барча дарслар бир синф учун бир хонада олиб борилади. Мактабларга дезинфекция воситалари маҳаллий ҳокимликлар томонидан етказиб берилади, ўқитувчилар томонидан эмас.
Коронавирус Ўзбек миллий академик драма театри директори, хизмат кўрсатган артист Фатҳулла Масъудовни 57 ёшида олиб кетди. Аввалги ҳафта «Сотти» роли билан машҳур бўлган таниқли актриса Дилбар Икромова коронавирусдан кўз юмган эди. Улкан қозонда пиширган паловини Гиннес рекордлар китобига киргизган таниқли ошпаз Баҳриддин Чустий ҳозир шифохонада коронавирусдан даволанмоқда.
Ўзбекистонда ташқаридаги коронавирусни йўқ қилувчи технология яратилгани айтилмоқда. У ҳаводаги ва нарса-буюмларнинг сиртидаги коронавирусга қирон келтиради, дейиляпти.
* * *
Ўзбекистонда Пиллачилик ва қоракўлчиликни ривожлантириш қўмитаси ҳам ташкил этиладиган бўлди. Қўмита пиллачилик ва қоракўлчилик соҳасида ягона давлат сиёсатини олиб бориш, шунингдек, ушбу тармоқларни ягона илмий-техникавий сиёсатни юритган ҳолда, мувофиқлаштирилган тарзда ривожлантиришни таъминлаш; тут плантациялари ва яйловларнинг қатъий ҳисобини юритиш ва фондини ўрганиш, шунингдек, пиллачилик ва қоракўлчиликни ривожлантириш учун озуқа базасини яхшилаш; ипак қурти ва қоракўл зотли қўйларнинг юқори даражада маҳсулдор наслларини жорий қилиш ва бошқа вазифаларни бажаради. Қўмиталар сони ўндан ошди.
* * *
Сўхлик блогер Ҳайдаржон Бобоҳайдаров (Дадахон Ҳайдаров) иккинчи сентябр куни қўйиб юборилди. Адвокатнинг айтишича, ҳимояси остидаги шахсни жиноят ишида айбланувчи тариқасида жалб этиш ва эҳтиёт чораси сифатида қамоққа олиш учун етарли асослар бўлмаган.
Аммо бу ҳафта яна бир блогерга нисбатан нохуш муносабат бўлдики, уни дайжестимизга қўшдик. Наманганлик видеомонтажчи блогер Шавкат Эгамбердиев Akfa, Artel ва Тошкент ҳокими ҳақидаги яратган ҳажвий видеоси интернетда кенг тарқалиб кетди. Видеода «6 секунд» деб ёзилган таксини ва автомашина орқа ойнасида пушти рангдаги калта пайпоқни кўриш мумкин. Кейин Шавкат Эгамбердиевнинг ўзи елкасида кондиционер кўтарган ҳолда кўринади ва чўнтагидан доллар валюталарини чиқариб, ҳавога сочади. Пуллар Cartel ва Brakfa ёзувлари акс этган бинолар томонга учади. Шунингдек, Cartel биносинининг пастида «любая монополия хороша» ва «духа нет» каби жумлалар ёзилган. Банкноталар шамол парраклари томон учади, бошқа томондан эса маиший техника воситалари чиқади. Brakfa деб ёзилган бинонинг том қисмида Жаҳонгир Ортиқхўжаевга ўхшаш киши Gangnam Style услубида рақсга тушмоқда...
Бу видео чиққач, Artel’чилар ижтимоий тармоқда монтажчини танқидбўрон қилди. Компания вакили блогер билан «суҳбатлашиш» учун атай Наманганга борган. Шундан кейин Шавкат Эгамбердиев «Instagram» орқали узр сўради. «Fayzbog.uz» воқеага бағишлаб қуйидаги фотоколлажни улашди.
* * *
Юртимиз мусулмонлари учун бу ҳафта жума намозини масжидда адо этиш қувончини ҳадя этди. Ярим йилдан бери жума намози ўқилмаган масжидлар жума куни кўп сонли намозхонлар билан тўлиб-тошди. Махсус комиссия белгилаган қоидалар асосида ижтимоий масофани сақлаган ҳолда «шахмат» кўринишида жойлашиб ибодат адо қилинди. Масжидларда ижтимоий масофаланишга имкон бериш учун ажратувчи чизиқлар тортилди. Намозхонлар ибодатга тиббий ниқобда келишига эътибор қаратилди. Буни ёддан чиқарганлар учун эса ниқоб берилиши йўлга қўйилди.
* * *
Халқимиз ҳаётида унчалик катта аҳамиятли бўлмаган бир янги қарор чиқди. Биз ҳам уни дайжестимизга шартта қўшиб юбордик. Гап Ўзбекистонда қўшфамилиялиликка рухсат берилгани ҳақида кетмоқда. Ҳукумат томонидан тасдиқланган ФҲДЁ соҳасига оид қарор билан никоҳланувчиларга қўшфамилияликка рухсат берилди. Масалан, куёв Аҳмедов, келин Шуҳратова бўлса, куёв Аҳмедов-Шуҳратов, келин эса Аҳмедова-Шуҳратова бўлиши мумкин. Яъни энди бизда ҳам Салтиков-Шчедрин, Антуан де Сент-Экзюпери, Гарриэт Бичер-Стоу каби фамилияли инсонлар пайдо бўлиши мумкин.
* * *
Авваламбор айтиш керакки, Ўзбекистонда очиқ осмон остида масофа сақлаб ўтказилаётган қабул имтиҳонлари The New York Times назарига тушиб, бош саҳифасидан ўрин олди. Стадионда имтиҳон топшираётган талабалар устига ёмғир томчилаганида улар устига узунасига целлофан тортиб қўйилгани расми ҳам кўпчиликнинг эътиборига тушди. Аммо жавоблар варақасидаги бир савол доирасида умуман жавоб белгиламаган абитуриент жавобни тўғри топгани (ҳа, тўғри ўқидингиз, расмга қаранг) кишини ниҳоятда ҳайрон қолдиради. Бу жавоблар варақасида нималар йўқ дейсиз. Қайси бири доирачаларга исмини бўяб ёзган бўлса, яна бир проректорнинг ўғли 60 та саволнинг барчасига тўлиқ тўғри жавоб бергани одамни шубҳаларга етаклайди.
Шунингдек, интернетда имтиҳон партаси остига нарса қўйиб кетган гуруҳ назоратчисининг видеоси тарқалди. ДТМ дарҳол изоҳ бериб назоратчи тиббий ниқоб қўйганини билдирди.
«Дарё»да қолинг ва энг сўнгги янгиликлардан энг биринчи хабардор бўлинг. Карантин тартиб-қоидаларига риоя қилинг, дейишдан чарчамаймиз.
Изоҳ (0)