Давлат тест маркази 2—3 сентябрь кунги тест синовларида тест топшириқлари расмга олиниб, интернетда тарқалгани бўйича текширув ўтказилганини маълум қилди.
Компьютер тақсимотидан аниқланишича, ушбу саволлар китоблари қуйидаги гуруҳларга юборилган:
- 2 сентябрь куни Фарғона вилояти 4-сектор (Марғилон шаҳри)да 1-сменада тест топшириши белгиланган 159-гуруҳ;
- 3 сентябрь куни Андижон вилояти 6-сектор 1-сменада тест топширилиши белгиланган 125-гуруҳ;
- 3 сентябрь куни Хоразм вилояти 1-сектор 1-сменада тест топширилиши белгиланган 26-гуруҳ.
Марказ 5 сентябрь куни Тошкентда назоратчининг абитуриентга ёрдам берган ҳолати аниқланганини билдирган.
Ижтимоий тармоқларда тарқалган сурат бўйича текширув ўтказилганда, ҳақиқатан ҳам, 5 сентябрь куни Тошкент шаҳридаги Талабалар шаҳарчаси хиёбонида, 1-сменада ўтказилган тест синовларида қоидабузарлик юз бергани етарли далил-исботлар билан тасдиқланган.
«Ушбу жараёнга дахлдор барча шахслар аниқланди ва чора кўрилиши учун тегишли ташкилотга тақдим этилган», – дейилади хабарда.
Аввалроқ интернетда имтиҳон партаси остига нарса қўйиб кетган гуруҳ назоратчисининг видеоси тарқалган, ДТМ мазкур ҳолатга изоҳ бериб, гуруҳ назоратчиси парта тагига телефон ёки шу каби бирор қурилма эмас, балки тиббий ниқобини қўйганини билдирганди.
Изоҳ (0)