Ўзбекистонда мажбурий меҳнат, айниқса, болалар меҳнатига қарши кучли кураш олиб борилаётган бўлса-да, аммо 2019 йили баъзи ҳудудларда пахта йиғим-терим мавсумида болалар меҳнатидан фойдаланилган. Бу ҳақда 5 сентябрь куни АОКАда бўлиб ўтган матбуот анжуманида Бандлик ва меҳнат муносабатлари вазири ўринбосари Баҳодир Умрзоқов таъкидлаб ўтди, дея хабар бермоқда «Дарё» мухбири Миролим Исажонов.
«Хабарларингиз бор, авваллари ҳар йили сентябрдаги ўқув жараёни пахта мавсуми билан боғлиқ бўларди. Болалар ва талабалар пахтага чиқарди, ўқиш даври Янги йилга яқин бошланарди. Бу халқаро нормаларга, ҳозирги талабларга ниҳоятда номувофиқ жараён эди. Шу боис Халқаро меҳнат ташкилоти раҳбари Ўзбекистонга келганида биринчи навбатда мамалакатда мажбурий меҳнатни тубдан йўқ қилиш масаласи қўйилганди. Президентимиз ташаббуси билан бу борада қонунлар қабул қилинди, конвенцияларга имзолар чекилди. Натижада мажбурий меҳнат, айниқса, болалар меҳнати бутунлай бартараф этилди ва бу бутун дунёга эълон қилинди.
Лекин шунга қарамасдан, 2019 йили айрим вилоят ва туманларда болалар меҳнатига йўл қўйилганлиги сезилди. Шу сабаб бизнинг терилган пахтамиз, пахтамиз дунё бозорида жуда кўп қийинчиликларга дучор бўлди. Чунки «Бу болалар меҳнати ва мажбурий меҳнат билан терилган пахта», деган гап-сўзлар туфайли сотув ишларимиз анча мураккаблашди. Шу муносабат билан 2020 йилги пахта мавсуми мана шу иккита мураккаб талабларга мувофиқ ташкил этилади», — деди Баҳодир Умрзоқов.
Изоҳ (0)