«Дарё»да «Самарқандда асли фермер бўлган маҳалла раиси камбағаллар учун ажратилган ёрдам пулини ўз ишчиларига тарқатди» сарлавҳали хабар эълон қилинганди. Мазкур хабарда келтирилган фактлар Олий Мажлис Қонунчилик палатаси депутатлари Наврўз Ризаев ҳамда Ғайрат Абдиевлар берган маълумотга асосланган эди.
Кўп ўтмай, мазкур хабарга муносабат билдирган Тойлоқ туман ҳокимлиги ҳудудда икки юздан ортиқ ўзига тўқ оилалар кам таъминланганлар рўйхатига киритилганини рад этди. «Дарё» мухбири Фарҳод Норбўтаевга мазкур маълумотни берган депутат ҳам айтган гапидан қайтди.
«Тойлоқдаги икки юз нафар одамнинг нотўғри рўйхатга киритилиб, кейин чиқарилгани ҳақида менга берилган ахборотни англашилмовчиликда, бошқача талқин қилганман. Буни таҳлил қилдим. Бу кейин аниқ бўлди. Беайб Парвардигор», — деди Олий Мажлис Қонунчилик палатаси депутати Наврўз Ризаев ўз хатосини тан олар экан.
Тойлоқ туман ҳокимлиги, шунингдек, хабардаги «айрим жойлардаги маҳалла раисларининг фермер хўжалиги ҳам бор бўлиб, улар ишчиларига ойлик сўрамаслик шарти билан эҳтиёжманд аҳолига берилиши лозим бўлган ёрдам пулларини бериб юборган», деган жумлага ҳам эътироз билдириб, туманда бундай ҳолат йўқлигини ёзган.
Ваҳоланки, мазкур хабарда МФЙ раислари орасида асли фермерлар бўлгани ва моддий ёрдам пулларини ишчиларига бериб юборгани ҳақидаги гапда Тойлоқ тумани тилга олинмаган.
Эслатиб ўтамиз, аввалроқ Олий Мажлис депутатининг Тойлоқ туманида икки юздан ортиқ ўзига тўқ оилалар кам таъминланганлар рўйхатига киритилгани, кейинчалик депутатлар аралашуви билан рўйхат ўзгартирилгани хабар берилганди. Исбот сифатида депутатнинг овози ҳам тарқатилганди.
Изоҳ (0)