Профессор Илмира Розиқова дезинфекция туннелларининг инсон организмига зарарли томонлари ҳақида гапирди. Шунингдек, у давомий ишлатилган ҳар бир кимёвий модда инсон организмида аллергик ҳолатларни келтириб чиқаришини қайд этди, деб ёзмоқда Соғлиқни сақлаш вазирлигининг ахборот хизмати.
«Коронавирусга қарши курашилаётган бир пайтда, кўрилаётган ҳар бир чора-тадбирнинг фойдалилиги, самарадорлигини ўрганиш аҳамиятли.
Лекин профилактика мақсадида қўлланадиган айрим чоралар самарасиз экани, уларнинг салбий оқибатлари кўпроқлигини вақт кўрсатиб қўймоқда.
Шундай чоралардан бири—дезинфекция туннеллари. Ҳозирда бундай туннеллар деярли ҳар бир ташкилот, хусусан, умумий овқатланиш объектлари, аэропорт, темир йўл вокзаллари, бозорлар, савдо марказлари каби қатор муассаса бинолари олдида ўрнатилган. Ҳатто кириш йўлакларининг бошқа қисмлари қизил ленталар билан ўралиб, одамларга шу туннел орқали ўтишдан бошқа йўл қолдирилмаган», – дейди Илмира Розиқова.
Республика ихтисослаштирилган аллергология илмий-амалий тиббиёт маркази директори, тиббиёт фанлари доктори, профессор Илмира Розиқова бундай туннелларнинг инсон организми учун зарарли томонларига тўхталиб ўтган.
«Дезинфекция чораси сифатида хлорли эритмалардан фойдаланишни дунё давлатлари тажрибадан ўтказди. Америкалик экспертларнинг таъкидлашича, кўчаларни дезинфекция қилиш ва дезинфекция туннелларидан кенг фойдаланиш кўпроқ инсонларни ваҳимага тушмаслиги ёки уларни тинчлантириш мақсадида амалга оширилган. Шуни айтиш лозимки, бунинг самараси ҳанузгача исботланмаган», — деган мутахассис.
Шунингдек, олима дезинфекция туннелларида фойдаланиладиган хлорли эритмалар тиббиётда жуда кўп йиллардан бери ишлатилишини ва унинг инсон организмига хатарли таъсири жуда кучли эканини таъкидланган.
ССВ хабарида кун давомида ишлаб турган туннелдан бир киши қайта-қайта ўтишига тўғри келиши мумкинлиги, давомий ишлатилган ҳар бир кимёвий модда инсон организмида аллергик реакцияларни келтириб чиқариши қайд этилган.
Аллерголог Илмира Розиқова бунинг асоратлари ўта хавфли тус олиб кетиши мумкинлиги ҳақида огоҳлантирди.
Розиқованинг айтишича, бу юқори нафас йўлларининг енгил қизаришидан то енгил куйишгача бўлган ҳолатларни чақириши мумкин. Оқибатда инсонда аллергик ринит, конюктивит, бронхит ва ҳатто оғир касаллик ҳисобланувчи – бронхиал астма касалликлари келиб чиқади.
«Мактаблар фаолиятини қайта тиклаш масаласи кўтарилганида, болаларнинг соғлиғига салбий таъсирларни инобатга олиб, Соғлиқни сақлаш вазирлиги таълим муассасалари олдида дезинфекция туннелларини ўрнатиш қатъиян ман этилишини таъкидлаган», —дейилади хабарда.
Жаҳон соғлиқни сақлаш ташкилоти ҳам бундай туннелларнинг самарадорлиги исботланмаганлигини билдирган.
«Дезинфекция туннелларини метро ёки бошқа муассаса бинолари олдида ўрнатилиши шарт эмас деб ҳисоблаймиз. Ҳозирда бундай нотўғри профилактика кўз конюктиваси ва юқори нафас аъзоларининг аллергик шикастланишига сабаб бўлмоқда. Туннеллар ўрнига кириш жойларида ўзаро масофани сақлаш, иситмани ўлчаш ва қўлларга антисептик билан ишлов бериш йўлга қўйилгани мақсадга мувофиқ», — дейди аллерголог.
Аввалроқ Германиянинг етакчи вирусологларидан бири, Бонн университети Вирусология ва ОИВни тадқиқ қилиш институти директори, профессор Ҳендрик Штрик дезинфекциялаш учун мўлжалланган туннеллар COVID-19 коронавирус инфекциясидан ҳимоя қила олмаслиги, аммо улар ротавирус ва бошқа контактли инфекциялардан ҳимоя қилишини айтганди.
Изоҳ (0)