Соғлиқни сақлаш вазирлиги 6 сентябрь ҳолатига кўра, COVID-19 инфекцияси қайд этилган 43 476 нафар бемор (шундан 17 751 нафари аёл, 25 725 нафари эркак) ҳақида статистик маълумотларни эълон қилди.
Коронавирус инфекцияси аниқланган одамларнинг 12 173 нафари (28 фоиз) 30-39 ёшда, 10 304 нафари (23,7 фоиз) 20-29 ёшда, 7 521 нафари (17,3 фоиз) 40-49 ёшда, 5 347 нафари (12,3 фоиз) 50-59 ёшда, 2 652 нафари (6,1 фоиз) 10-19 ёшда, 2 565 нафари (5,9 фоиз) 60-69 ёшда, 1 956 нафари (4,5 фоиз) 0-9 ёшда, 739 нафари (1,7 фоиз) 70-79 ёшда ва 219 нафари (0,5 фоиз) 80 ва ундан катта ёш оралиғидаги инсонлар.
ССВ ахборотига кўра, 6 сентябрь ҳолати бўйича COVID-19 коронавирус инфекцияси билан касалланган беморлар учун тайёрланган шифо ўринларида 2 251 нафар бемор даволанмоқда.
«Уларнинг 198 нафари ўта оғир, 366 нафари оғир ҳолатда. Ўта оғир ва оғир ҳолатдаги 564 нафар бемордан 110 нафари сунъий нафас олиш аппаратида, 222 нафари ноинвазив сунъий нафас аппаратида SIPАП режимида ҳамда 175 нафари махсус мослама ёрдамида бурун орқали кислород олмоқда.
Ўта оғир ва оғир аҳволдаги 564 нафар беморнинг 353 нафари Зангиота комплексига, 56 нафари Тошкент шаҳрига, 38 нафари Самарқанд вилоятига, 31 нафари Сирдарё вилоятларига, 21 нафари Қашқадарё, 17 нафари Сурхондарё, 6 нафардан Бухоро ва Жиззах, 3 нафардан Наманган ва Хоразм ҳамда 1 нафари Қорақалпоғистон Республикасига тўғри келади», – дейди Соғлиқни сақлаш вазирлиги бош бошқарма бошлиғи Фаррух Шарипов
Ўзбекистонда коронавирус бўйича сўнгги таҳлилларга кўра касалланиш ва ўлим ҳолатлари, асосан, юрак қон-томир касалликлари, қандли диабет, ўпканинг сурункали касалликлари бўлган ва ортиқча вазн, тамаки, алкогол маҳсулотларини истеъмол қилган, шунингдек, камҳаракат инсонларда кўпроқ учраган.
Оғир ҳолатдаги барча беморларга Соғлиқни сақлаш вазирлиги бош мутахассислари, Республика шошилинч тиббий ёрдам илмий маркази мутахассислари томонидан видеоконсультациялар кўринишида амалий ёрдам кўрсатилмоқда. Бундан ташқари, Россия, Туркия давлатларидан ташриф буюрган мутахассислар ҳудудларда оғир беморларни маҳаллий мутахассислар билан кўриб, тавсиялар бермоқда, дейилади вазирлик ахборотида.
ССВ берган маълумотлар бўйича 6 сентябрь ҳолатига кўра, COVID-19 инфекциясидан вафот этган 345 нафар беморнинг 132 нафарини аёллар, 213 нафарини эркаклар ташкил этган. Ўлимнинг ёш тоифасига кўра, 6 нафар бемор 30 ёшгача, 26 нафар 30-40 ёш оралиғида, 45 нафар 40-50 ёш оралиғида, 99 нафар 50-60 ёш оралиғида, 106 нафар 60-70 ёш, 63 нафар 70 ёшдан катта беморлар.
Ўлим сабабига кўра, вафот этганларнинг 264 нафарида ўткир юрак қон-томир, нафас етишмовчилиги, 10 нафарида ўткир респиратор дистресс синдром, 8 нафарида тромбоэмболия, 4 нафарида ўткир миокард инфаркти ва бошқалар қайд этилган.
Эслатиб ўтамиз, 5 сентябрь куни Ўзбекистонда 295 кишида коронавирус аниқланган ҳамда даволаниш кўрсаткичи бўйича рекорд янгиланганди. Кетма-кет уч кун давомида янги касалланиш ҳолатлари сони 300 тага етмаган.
Изоҳ (0)