Шавкат Мирзиёев «Ўзбекистон Республикаси Мустақиллигининг 29 йиллиги муносабати билан коронавирус пандемиясига қарши курашишда фидойилик кўрсатган тиббиёт соҳаси ходимларидан бир гуруҳини мукофотлаш тўғрисида»ги фармонни имзолагани тўғрисида хабар берилганди. Мукофотланганлар орасида 4 нафар тиббиёт ходими вафотидан сўнг «Жасорат» медалига лойиқ кўрилган.
Соғлиқни сақлаш тизимини ривожлантириш, хусусан, коронавирус пандемияси кенг тарқалишининг олдини олиш, санитар-эпидемиологик осойишталикни таъминлаш ишига ўзининг билим ва салоҳияти, профессионал маҳорати билан муносиб ҳисса қўшгани, аҳоли саломатлигини муҳофаза қилиш, беморлар ҳаётини асраш, уларга меҳр ва ғамхўрлик кўрсатиш борасидаги алоҳида хизматлари, ўз ҳаёти ва соғлиғини хавф остига қўйиб, муқаддас шифокорлик бурчини виждонан адо этишдаги жасорати ва фидойилиги учун жами 99 киши турли унвон, орден ва медаллар билан тақдирланди.
Улардан 4 нафари вафотидан сўнг «Жасорат» медали билан мукофотланган.
- Одилжон Неъматов – Республика ихтисослаштирилган фтизиатрия ва пулмонология илмий-амалий тиббиёт марказининг ўпка сили жарроҳлиги бўлими мудири;
- Фаррух Рустамов – Тошкент вилояти кўп тармоқли тиббиёт маркази реанимация бўлими анестезиолог-реаниматологи;
- Венера Шарипова – Яккасарой тумани тиббиёт бирлашмаси марказий кўп тармоқли поликлиникаси бош ҳамшираси, Тошкент шаҳри;
- Баҳром Шукруллаев – Олмазор туманидаги 18-оилавий поликлиника шифокори, Тошкент шаҳри.
Бундан ташқари, Чилонзор тумани Санитария-эпидемиологик осойишталик маркази бактериология лабораторияси мудири 62 ёшли Марҳабо Аҳмедова, Қорақалпоғистоннинг Тахтакўпир тумани шифохонасининг 32 ёшли тез тиббий ёрдам ҳамшираси Алия Жиемуратова коронавирус асоратларидан вафот этгани хабарлар берилган.
Шу билан бирга, Сирдарё вилоятида коронавирусдан вафот этган илк бемор ҳам 69 ёшли тиббиёт ходими бўлган. Қорақалпоғистонда яна бир шифокор коронавирус қурбонига айланганини Нурмат Отабеков тасдиқлаганди.
Изоҳ (0)