Тўйгача бўлган даврда югур-югурлар кўп бўлгани боис келин-куёвларнинг иммунитети тушиб кетиши мумкин. Бу ҳақда Коронавирусга қарши кураш штаби аъзоси Барно Абдусаматова «Шифобахш» Telegram каналида маълум қилди.
Барно Абдусаматованинг айтишича, ҳозирги пандемия шароитида улар ўзларига жуда эътиборли бўлиши лозим.
«Улар тўй қачон бўлишини биладиган кап-катта инсонлар. Карантин эълон қилинган вақтдан буён асосий учта талаб: санитария ва гигиена қоидаларига риоя қилиш, ижтимоий масофа сақлаш, ниқоб тақиш айтиб келинмоқда. Мана шу учтагина қоидага жиддий эътибор берилса, вирус юқтириш эҳтимоли камаяди. Буни Жаҳон соғлиқни сақлаш ташкилоти исботлаб берди», – деди мутахассис.
Унинг алоҳида таъкидлашича, тўйгача келин ва куёвда «югур-югур»лар кўп бўлгани боис вақтида овқатланмаслик, ухламаслик натижасида уларнинг иммунитети тушиб кетади. Бу эса вирус юқиши эҳтимолини оширади.
«Шунинг учун улар кун тартибини тўғри тузиши – ўз вақтида овқатланиши ва дам олиши лозим. Шунингдек, ортиқча учрашувлардан ўзларини сақлаб туриши керак. Чунки бир-бирларининг саломатлигини – келин тушаётган, куёв эса куёв бўлаётган оиланинг саломатлигини ўйлашга мажбур. Ҳозирги фақат ўзимизни эмас, бошқаларни ҳам саломатлиги ҳақида ўйлайдиган вақт», – деди штаб аъзоси.
Ўзбекчиликда ёши катта инсонлар маросимларда бош бўлиб туради, икки ёшга кекса отахон ва онахонларимиз дуо беради. Барно Абдусаматова тўй қилаётган инсонларнинг яқин қариндоши бўлмаган, хавф гуруҳида бўлган ёши катталарни тўй ва маросимларга вақтинчалик бормай туришини маслаҳат берди.
«Тўйлар ва катта маросимларга ҳар хил тоифадаги, ҳар хил ёшдаги инсонлар келади. Улар билан муомала қилишга мажбур бўлинади ва бунда вирус юқтириш даражаси ошади. Шунча вақт ёши улуғларни уйдан чиқармай, асраб-авайлаб келдик. Ҳали шошилмаслигимиз зарур, биз ҳали ҳам пандемия даврида яшаяпмиз», – дея қўшимча қилди у.
Аввалроқ келин ва куёвларнинг тўйдан аввал коронавирусга тест топшириши қўшимча ҳимоя бўлиши мумкинлиги ҳақида айтиб ўтилган эди.
Изоҳ (0)