Тошкентда автобуслар 30, 31 август ва 1 сентябрь кунлари дам олиш куни ҳисобида ҳаракатланади

Шавкат Мирзиёевнинг «2020 йилда расмий саналарни нишонлаш даврида қўшимча ишланмайдиган кунларни белгилаш ва дам олиш кунларини кўчириш тўғрисида»ги фармонига асосан Мустақиллик байрами кунлари аҳолининг дам олиши учун қўшимча қулайлик яратиш мақсадида 2020 йилнинг 29 август — шанба дам олиш куни 31 август — душанба кунига кўчирилди.

Шу муносабат билан «Тошшаҳартрансхизмат»АЖ байрам кунларидаги автобус қатновларини бир қатор ўзгаришлардан келиб чиқиб йўлга қўймоқда.

Компаниянинг маълум қилишича, 29 август куни автобуслар ҳаракат жадвали иш куни ҳисобида шакллантирилади. Қайд этилишича, 30, 31 август ва 1 сентябрь кунлари автобуслар дам олиш куни ҳисобида ҳаракатланади.

Компания йўловчилардан мазкур кунларда жамоат транспортидан фойдаланганда юқоридаги ўзгаришларни инобатга олишларини сўраган.

Аввалроқ «Тошшаҳартрансхизмат» 2 та автобус йўналиши ҳаракатига вақтинчалик ўзгартириш киритгани ҳақида хабар қилинганди.