Наманган вилоятининг Тўрақўрғон туманида яшовчи аёл 2020 йил 20 август куни вилоят ички ишлар бошқармасига фирибгарлик ҳолатига дуч келгани юзасидан ариза билан мурожаат қилди. Бу ҳақда «Дарё»га вилоят ИИБ матбуот хизмати маълум қилди.
Мурожаатдан маълум бўлишича, 2019 йил апрель ойида аёл Чортоқ туманида яшовчи шахс билан танишиб қолади. У аёлга туманда ўзига тегишли бўлган МЧЖ борлиги, унинг қошида боғча қуриш учун 35 сотих ер майдони бўлиб, уни сотмоқчи эканлигини айтади. Аёл 50 миллион сўм эвазига ерни сотиб олади.
Бироқ орадан шунча вақт ўтса ҳам ерни расмийлаштириш ишлари чўзила бошлайди. Кутавериб сабри қолмаган аёл ишни охирига етказиш нима қилиш кераклигини сўрайди.
Осон йўл билан бойлик орттиришни кўзлаган шахс аёлга Чортоқ туман ҳокимининг ўринбосари билан гаплашгани, ҳоким ўринбосари МЧЖ ва боғча учун ажратилган ерни номига расмийлаштириш учун 7000 доллар сўрагани, ўзининг харажатлари учун 3000 доллар кетиши, жами 10 минг доллар бериши кераклигини айтади.
Фирибгар тузоғига тушганини пайқаган аёл ИИБга мурожаат қилади. Аризага асосан вилоят ИИБ ЖҚБ коррупция ва иқтисодий жиноятларга қарши курашиш бўлими ходимлари томонидан тезкор тадбир ўтказилди. Чортоқ туманидаги тамаддихоналардан бирида аёл мазкур шахс билан учрашиб, у сўраган пулларни бераётган вақтида фуқаро қўлга олинди.
Ҳозирда ушбу ҳолат юзасидан Чортоқ тумани ИИБ ҳузуридаги тергов бўлими томонидан терговга қадар суриштирув ишлари олиб борилмоқда.
Изоҳ (0)