Бугун,

  • USD 11095.31
  • RUB 173.84
  • EUR 10772.44

Ижтимоий тармоқларда 17 август, душанба куни Ўзбекистон бош вазири Абдулла Арипов Бухоро вилоятига ташриф буюргани ҳақида хабарлар тарқалди. Бу ҳақда биринчилардан бўлиб, соат 16:46 да Bukhara Info! канали хабар тарқатди. «Бош вазир Бухорога ташриф буюрди. Айни дамда селектор йиғилиши бўлиб ўтмоқда», — дейилади Bukhara News каналининг соат 16:56 даги хабарида. «Миш-мишларга кўра, янги мансабдор шахснинг тайинланиши кутилмоқда», — деб ёзди соат 17:40 да бош вазирнинг Бухорога келгани ҳақида хабар берган «Подслушано в Бухаре» канали.

Бош вазир матбуот хизматидан «Дарё»га маълум қилишларича, Абдулла Арипов 17 август куни ҳақиқатан ҳам Бухоро вилоятида бўлиб қайтган. Бухоро вилояти ҳокимлигидан «Дарё»га билдиришларича, бош вазирнинг ташрифи вилоят ҳокимининг аҳволи билан боғлиқ эмас — ҳукумат раҳбари бу ерда қишлоқ хўжалиги масаласида йиғилиш ўтказиб, қайтиб келган.

Бош вазирнинг Бухорога боргани ҳақидаги хабарлар ортидан, тахминан, соат 17:00 дан бошлаб ижтимоий тармоқлар ва ОАВларда вилоят ҳокими вазифасини бажарувчи Карим Камолов ҳақида зиддиятли хабарлар тарқала бошлади. Соат 18:34 да «Xabar.uz» ўз манбаларига асосланиб Карим Камоловнинг вафот этгани ҳақида хабар берди. Худди шу вақтда UZ24 сайти «ишончли манбалар»га асосланиб вилоят раҳбари даволанишни давом эттираётгани, унинг ҳолатини мутахассислар назорат қилиб турганини маълум қилди. Шундан сўнг Бухоро янгиликларини ёритиб борувчи каналлар Карим Камоловнинг вафоти ҳақида ёза бошлади.

Бу орада Халқаро пресс-клуб раиси Шерзодхон Қудратхўжаев ҳокимнинг оила аъзоларига асосланиб, «Карим Жамолович Камоловнинг ўлими тўғрисидаги хабарлар ёлғон»лиги, унинг оила аъзолари Қудратхўжаевдан «журналистлар ва блогерлар фейк хабар тарқатмасликни сўрагани»ни маълум қилди. Соат 19:44 да эса Bukhara News канали вилоят Соғлиқни сақлаш бошқармаси бошлиғи Илҳом Нарзиевга асосланиб, «Карим Камоловнинг аҳволи жуда оғир, кома ҳолатида» экани ҳақида хабар берди. Айни вақтда канал ҳокимнинг уйи атрофи тезкорлик билан асфальт қилинаётгани, Ҳазрат Имом қабристонида ободонлаштириш ишлари олиб борилаётганини ёзган.

Бухородаги Ҳазрати Имом қабристони олдида ободонлаштириш ишлари олиб борилмоқда, 2020 йил 17 август.

Бухородаги Ҳазрати Имом қабристони олдида ободонлаштириш ишлари олиб борилмоқда, 2020 йил 17 август.
Фото: Telegram / @BukharaNewsUz

Соат 20:03 да Бухоро вилояти ҳокимлиги ижтимоий тармоқлар ва ОАВда тарқалган хабарлар юзасидан расмий ахборот берди. Ҳокимлик матбуот хизмати Карим Камоловнинг вафоти ҳақидаги гап-сўзлар «ҳеч қандай асосга эга эмас»лигини таъкидлаб, вилоят раҳбари Тошкент шаҳрида даволанаётгани, унинг саломатлиги малакали мутахассислар назоратида эканини маълум қилди.

Бухоро вилояти ҳокимлиги матбуот хизмати раҳбари Олим Жўраевнинг «Дарё»га маълум қилишича, вилоят раҳбарининг аҳволи кеча (16 август куни) кечқурун оғирлашган, аммо у ҳаёт. «Ҳокимнинг яшаш манзилида бугун асфальтлаш ишларининг бошлангани бу таъзияга тайёргарликмас, ҳамма жойда қурилиш ишлари давом этяпти. Худди шунингдек, менинг ҳам кўчамда таъмирлаш бошланган. Бу таъзияга тайёргарлик, деганимас!», — деди Олим Жўраев.

Бухоро вилояти ҳокими вазифасини бажарувчи Карим Камолов коронавирусга чалиниб, Тошкентда касалликдан даволанаётгани ҳақида илк бор 30 июль куни Соғлиқни сақлаш вазирлиги ҳузуридаги Коронавирусга қарши кураш штаби аъзолари маълум қилган эди. Бухоро вилояти ҳокимлиги 31 июль куни ушбу ахборотни тасдиқлаб, ҳокимда касаллик 25 июль куни тасдиқлангани, у дастлаб Республика шошилинч тиббий ёрдам илмий маркази Бухоро вилояти филиалида даволангани, 29 июль Тошкентга кўчирилганини маълум қилди.

Карим Камолов.

Карим Камолов.
Фото: «Дарё» / Мадина Нурман

«Ҳозирда Карим Камоловнинг аҳволи яхши. У яқин кунларда тўлиқ тузалиб, ўз фаолиятини давом эттиради», — дея таъкидланганди ҳокимликнинг 31 июлдаги ахборотида. Кейинчалик ҳокимнинг коронавирус асоратларидан вафот этгани ҳақида хабарлар тарқалди, бунга ойдинлик киритиш мақсадида 7 август куни ўтказилган брифингда ҳоким ўринбосари Фарҳод Умаров бундай шов-шувлар ўринсизлиги, ҳоким Камоловнинг аҳволи яхши, хавотирга ўрин йўқлигини, у яқин кунларда тузалиб, фаолиятини давом эттиришини маълум қилди.

11 август куни Коронавирусга қарши курашиш бўйича штаб аъзоси Рустам Икромов коронавирусга чалинган ва айни вақтда даволанишда бўлган юқори мартабали шахслар аҳволи ҳақида ахборот бераркан, айни кунларда уларнинг саломатлигида ташвишли нарса йўқлигини, даволаш ишлари давом этаётганини маълум қилган эди. Кейинроқ, 16 август куни Сурхондарё ҳокими Тўра Боболов (унинг касаллангани расман 18 июлда маълум қилинган эди), 17 август куни эса Навоий вилояти ҳокими Қобул Турсунов (у 27 июлдан бунён Тошкентда даволанаётган эди) коронавирусдан даволаниб, ишга қайтгани маълум бўлди.

Эслатиб ўтамиз, 31 июль куни Қорақалпоғистон Жўқорғи Кенгеси раиси, Ўзбекистон Қаҳрамони, сенатор Муса Ерниязов коронавирус инфекцияси асоратларидан вафот этган эди. Унда коронавирус 24 июнь куни тасдиқланган, бир ой оғир аҳволда бўлган, бироқ унинг касаллиги 18 июлга қадар яширилган эди.

Изоҳ
Асосий янгиликлар
Маҳаллий
Ҳуқуқ фаоли Нукус воқеаларида гумонланаётганлар қийноққа солинмаганини айтмоқда
Дунё
«Дарё» кундалигида 30 ноябрда содир бўлган энг муҳим воқеалар
Маҳаллий
Контрабанда сигареталар кўпроқ қайси вилоятлар чегараларидан олиб ўтилмоқда? Божхоначи жавоб берди