Ijtimoiy tarmoqlarda 17-avgust, dushanba kuni O‘zbekiston bosh vaziri Abdulla Aripov Buxoro viloyatiga tashrif buyurgani haqida xabarlar tarqaldi. Bu haqda birinchilardan bo‘lib, soat 16:46 da Bukhara Info! kanali xabar tarqatdi. “Bosh vazir Buxoroga tashrif buyurdi. Ayni damda selektor yig‘ilishi bo‘lib o‘tmoqda”, — deyiladi Bukhara News kanalining soat 16:56 dagi xabarida. “Mish-mishlarga ko‘ra, yangi mansabdor shaxsning tayinlanishi kutilmoqda”, — deb yozdi soat 17:40 da bosh vazirning Buxoroga kelgani haqida xabar bergan “Podslushano v Buxare” kanali.
Bosh vazir matbuot xizmatidan “Daryo”ga ma’lum qilishlaricha, Abdulla Aripov 17-avgust kuni haqiqatan ham Buxoro viloyatida bo‘lib qaytgan. Buxoro viloyati hokimligidan “Daryo”ga bildirishlaricha, bosh vazirning tashrifi viloyat hokimining ahvoli bilan bog‘liq emas — hukumat rahbari bu yerda qishloq xo‘jaligi masalasida yig‘ilish o‘tkazib, qaytib kelgan.
Bu orada Xalqaro press-klub raisi Sherzodxon Qudratxo‘jayev hokimning oila a’zolariga asoslanib, “Karim Jamolovich Kamolovning o‘limi to‘g‘risidagi xabarlar yolg‘on”ligi, uning oila a’zolari Qudratxo‘jayevdan “jurnalistlar va blogerlar feyk xabar tarqatmaslikni so‘ragani”ni ma’lum qildi. Soat 19:44 da esa Bukhara News kanali viloyat Sog‘liqni saqlash boshqarmasi boshlig‘i Ilhom Narziyevga asoslanib, “Karim Kamolovning ahvoli juda og‘ir, koma holatida” ekani haqida xabar berdi. Ayni vaqtda kanal hokimning uyi atrofi tezkorlik bilan asfalt qilinayotgani, Hazrat Imom qabristonida obodonlashtirish ishlari olib borilayotganini yozgan.
Soat 20:03 da Buxoro viloyati hokimligi ijtimoiy tarmoqlar va OAVda tarqalgan xabarlar yuzasidan rasmiy axborot berdi. Hokimlik matbuot xizmati Karim Kamolovning vafoti haqidagi gap-so‘zlar “hech qanday asosga ega emas”ligini ta’kidlab, viloyat rahbari Toshkent shahrida davolanayotgani, uning salomatligi malakali mutaxassislar nazoratida ekanini ma’lum qildi.
Buxoro viloyati hokimligi matbuot xizmati rahbari Olim Jo‘rayevning “Daryo”ga ma’lum qilishicha, viloyat rahbarining ahvoli kecha (16-avgust kuni) kechqurun og‘irlashgan, ammo u hayot. “Hokimning yashash manzilida bugun asfaltlash ishlarining boshlangani bu ta’ziyaga tayyorgarlikmas, hamma joyda qurilish ishlari davom etyapti. Xuddi shuningdek, mening ham ko‘chamda ta’mirlash boshlangan. Bu ta’ziyaga tayyorgarlik, deganimas!”, — dedi Olim Jo‘rayev.
“Hozirda Karim Kamolovning ahvoli yaxshi. U yaqin kunlarda to‘liq tuzalib, o‘z faoliyatini davom ettiradi”, — deya ta’kidlangandi hokimlikning 31-iyuldagi axborotida. Keyinchalik hokimning koronavirus asoratlaridan vafot etgani haqida xabarlar tarqaldi, bunga oydinlik kiritish maqsadida 7-avgust kuni o‘tkazilgan brifingda hokim o‘rinbosari Farhod Umarov bunday shov-shuvlar o‘rinsizligi, hokim Kamolovning ahvoli yaxshi, xavotirga o‘rin yo‘qligini, u yaqin kunlarda tuzalib, faoliyatini davom ettirishini ma’lum qildi.
11-avgust kuni Koronavirusga qarshi kurashish bo‘yicha shtab a’zosi Rustam Ikromov koronavirusga chalingan va ayni vaqtda davolanishda bo‘lgan yuqori martabali shaxslar ahvoli haqida axborot berarkan, ayni kunlarda ularning salomatligida tashvishli narsa yo‘qligini, davolash ishlari davom etayotganini ma’lum qilgan edi. Keyinroq, 16-avgust kuni Surxondaryo hokimi To‘ra Bobolov (uning kasallangani rasman 18-iyulda ma’lum qilingan edi), 17-avgust kuni esa Navoiy viloyati hokimi Qobul Tursunov (u 27-iyuldan bunyon Toshkentda davolanayotgan edi) koronavirusdan davolanib, ishga qaytgani ma’lum bo‘ldi.
Eslatib o‘tamiz, 31-iyul kuni Qoraqalpog‘iston Jo‘qorg‘i Kengesi raisi, O‘zbekiston Qahramoni, senator Musa Yerniyazov koronavirus infeksiyasi asoratlaridan vafot etgan edi. Unda koronavirus 24-iyun kuni tasdiqlangan, bir oy og‘ir ahvolda bo‘lgan, biroq uning kasalligi 18-iyulga qadar yashirilgan edi.
Izoh (0)