Фарғона вилоятида тез ёрдам ходимларини уриб, уларга тан жароҳати етказган шахс қамоққа олинди. Бу ҳақда «Дарё»га вилоят ИИБ ахборот хизмати маълум қилди.
Қайд этилишича, 2020 йилнинг 3 август куни Олтиариқ тумани «Катпут» МФЙ Бинокор кўчаси 5-уйга чақирувга борган тез ёрдам ходимлари мазкур кўчанинг кириш қисмида фуқаролар М.Қ. ва Б.М.нинг ўзаро жанжаллашиб турганига гувоҳ бўлган.
Тиббиёт ходимлари жанжал оқибатида жароҳатланган Б.М.га тиббий ёрдам кўрсатиш мақсадида тўхтаган. Шу вақтда М.Қ. жамиятда юриш-туриш қоидаларини қасддан менсимасдан, ҳайдовчи Б.П. ва ҳамшира О.П.ни қўли билан уриб, уларга тан жароҳати етказган.
Олтиариқ тумани ИИБ ҳузуридаги тергов бўлими томонидан М.Қ.га нисбатан Жиноят кодексининг 277-моддаси 3-қисми «г» банди (безорилик) билан жиноят иши қўзғатилиб, унга нисбатан қамоққа олиш тарзидаги эҳтиёт чораси қўлланилган.
Ҳозирда ҳолат юзасидан дастлабки тергов ҳаракатлари олиб борилмоқда.
Изоҳ (0)