Олий ва ўрта махсус таълим вазирлиги ота-оналарни хориждаги сохта ОТМларга алданиб қолишдан огоҳлантирди

Олий ва ўрта махсус таълим вазирлиги бошқарма бошлиғи Абдували Холиқов ота-оналарни хориждаги айрим сохта олий таълим муассасалари чақирувига алданиб қолмасликларини сўради. Бу ҳақда «Kun.uz» хабар бермоқда.

Маълум қилинишича, АОКА биносида 10 август, душанба куни ўтказилган матбуот анжуманида бошқарма бошлиғи шу мавзуда берилган саволга ўз фикрларини билдирган.

«Афсуски, фуқароларимизнинг хориждаги сохта ОТМлар чақирувига алданиб қолиши борасидаги муаммолар жуда кўп. Бу ёлғонларни ўзимизнинг айрим олғир ‘тадбиркорлар’ қилаётгани эса ундан-да ачинарли.

Биласиз, ахборот хизматимиз томонидан Telegram тармоғида вазирликнинг ‘edu.uz’ канали юритиб борилади. Бу канал орқали шу каби сохта ОТМларга алданиб қолмаслик бўйича доимий эслатмаларни бериб борамиз.

Маълумот ўрнида айтишим керакки, Наманган шаҳридаги Ёшлар иттифоқи биносида хорижга ўқишга юборишни ваъда қилиб, одамларни алдаб келган сохта фирма аниқланган. Бу фирма ўша бинода фаолият юритгани эса ўша жойдаги ташкилот масъулларининг бефарқлиги натижаси деб ўйлайман.

Бу эртага ўша ердаги ёшлар билан боғлиқ муаммоларни келтириб чиқарадики, одамлардан пулини олган ‘тадбиркорларъни тополмай қоламиз.

Хабарингиз бор, баҳорда қўшни давлатларда ўқиётган талабаларнинг ҳужжатларининг Ўзбекистонга кўчирилишига рухсат берилган эди.

Ўшанда Ташқи ишлар вазирлиги берган дастлабки маълумот бўйича, бизда йигирма саккиз ярим мингга яқин талаба қўшни давлатларда ўқиши ҳақида маълумот бор эди.

Учта қўшни давлат — Қозоғистон, Қирғизистон, Тожикистондан ҳужжатлар қабул қилиниши бошлангандан кейин маълум бўлдики, 55 мингдан ортиқ ҳужжат келиб тушган.

Олий таълим вазирлиги ушбу маълумотларни тасдиқлатганида кўпчилик талабалар қўшни давлатлардаги 2-3 та таълим муассасасида ўқиётгани маълум бўлди.

Ўзини талаба сифатида таништирган аксарият ёшларнинг эса ўқиши борасида бирор маълумот топилмади ҳам.

Бу ўз-ўзидан фуқароларимиз кимларнингдир гапига ишониб, ҳужжатларни қалбакилаштириши оқибатида юзага келаётган муаммолардир. Мен талабаларимиз ва уларнинг ота-оналаридан ана шундай фирибгарлар ва сохта ОТМларнинг чақирувларига ишониб қолмасликни сўраган бўлардим», — деди Абдували Холиқов.

Аввалроқ Абдували Холиқов тест билан бир вақтда ижодий имтиҳон олинадиган йўналишларда 2020 йил ижодий имтиҳонлар бекор қилиниши мумкинлигини маълум қилган эди.