Тошкентда 151 та янги касалланиш ҳолати қайд этилди. Ўзбекистонда коронавирусга чалинганлар сони 24 минг нафардан ошди

Ўзбекистонда 2020 йил 31 июль соат 23:30 ҳолатига кўра яна 236 кишида коронавирус инфекцияси борлиги аниқланди ва касалланганларнинг умумий сони 24 009 нафарга етди. Бу ҳақда Соғлиқни сақлаш вазирлиги хабар қилди.

Янги касалланиш ҳолатларининг

• 151 таси Тошкент шаҳрида;
• 85 таси Тошкент вилоятида тана ҳарорати кўтарилганлиги сабабли профилактика мақсадида ҳамда коронавирусга чалинган беморлар билан мулоқотда бўлганлиги сабабли намуна олинган фуқаролар орасида аниқланган.

Шунингдек, 31 июль куни Тошкент шаҳрида 467 нафар, Тошкент вилоятида 184 нафар, Андижон вилоятида 41 нафар, Қашқадарё вилоятида 32 нафар, Хоразм вилоятида 22 нафар, Сирдарё вилоятида 21 нафар, Наманган вилоятида 13 нафар ҳамда Фарғона вилоятида 4 нафар, жами 784 нафар бемор тузалиб, кунлик рекорд янгиланган. Кетма-кет беш кундан бери бу борадаги натижа яхшиланиб келмоқда.

Ўзбекистонда COVID-19 коронавирус инфекциясидан тузалган беморлар сони 14 464 нафарни (60 фоиз) ташкил қилмоқда. Мамлакатда 9 404 нафар беморга шифокорлар томонидан белгиланган стандартлар бўйича даво чоралари кўрилмоқда.

Шунингдек, 31 июль куни Қорақалпоғистон Жўқорғи Кенгеси раиси, Олий Мажлис Сенати раиси ўринбосари Муса Ерниязов 72 ёшида Нукусда вафот этди. Ўзбекистон Соғлиқни сақлаш вазирлиги (ССВ) 18 июль куни Қорақалпоғистон Республикаси Жўқорғи Кенгеси раиси Муса Ерниязов коронавирусга чалингани ҳақида хабар берган эди. Кейинчалик Қорақалпоғистон Соғлиқни сақлаш вазирлиги Муса Ерниязовнинг аҳволи асосий касаллик асоратлари ҳисобига стабил оғир бўлиб тургани, у мутахассислар томонидан ўтказилган реанимацион чораларга қарамасдан, ўткир нафас ва юрак қон-томир етишмовчилиги, ўткир респиратор дистресс синдромидан вафот этганини маълум қилган.

Соғлиқни сақлаш вазирлиги юритаётган статистикага кўра коронавирус асоратлари оқибатида 141 та ўлим ҳолати қайд этилган. «Дарё» ҳисоби бўйича коронавирусга чалингач, вафот этганлар сони 148 нафарни ташкил этмоқда.

Давлат хизматлари агентлиги 15 июль куни Навоий вилоятидаги 61 ёшли ходими Адҳамжон Деҳқонов, Маданият вазирлиги эса 18 июль куни 32 ёшли ходими Акмал Ирисов коронавирус асоратларидан вафот этгани, Олмалиқ шаҳри ҳокимлиги 9 ва 15 июль кунлари шаҳар шифохоналарида вафот этган икки аёлда коронавирус тасдиқлангани ҳақида хабар берган. Шунингдек, 22 июлда Бош прокурорнинг собиқ ўринбосари, Қорақалпоғистон прокуратурасида бўлим бошлиғи бўлиб ишлаётган 66 ёшли Ҳакимбай Халимов, Чилонзор тумани Санитария-эпидемиологик осойишталик маркази бактериология лабораторияси мудири 62 ёшли Марҳабо Аҳмедова коронавирус асоратларидан вафот этгани хабар қилинган.

Бироқ ушбу олти ўлим ҳақида ССВ томонидан айни вақтгача ахборот берилмаган.