Тошкентда коронавирусга чалинган 55 ёшли эркак ҳаётдан кўз юмди

Тошкент шаҳрида коронавирусга чалинган 55 ёшли Н.Д. исмли эркак вафот этди. Бу ҳақда Соғлиқни сақлаш вазирлиги хабар берган.

Хабарга кўра Тошкент шаҳри Шайхонтоҳур туманида яшаган 55 ёшли Н.Д. 19 июль куни оғир ҳолатда Вирусология илмий-текшириш институти клиникасининг жонлантириш бўлимига ётқизилган.

Шифохонада унда COVID-19 инфекцияси борлиги тасдиқланган. Беморга COVID-19 инфекциясининг ўта оғир кечиши, икки томонлама пневмония ташхиси қўйилган. Касаллик ўткир респиратор дистресс синдроми, ўткир нафас етишмовчилиги, ўпка шиши, кенг тарқалган миокард инфаркти асорати билан кечган.

Шунингдек, бемор юрак ишемик касаллиги, стабил зўриқиш стенокардияси, гипертония, артериал гипертензия, семизликнинг 3-даражаси каби ҳамроҳ хасталиклар билан ҳам оғриган.

Шифохонада беморнинг даволаниши давомида шифокорлар томонидан консультация ва консилиумлар қилинган, даволаш жараёни мутахассислар тавсияси асосида олиб борилган.

«Шифокорлар томонидан стандартлар асосида ўтказилган реанимацион муолажаларга қарамасдан беморнинг аҳволи асосий касаллик ҳисобига кескин оғирлашиб, ўткир нафас ва юрак қон-томир етишмовчилиги, ўпка шиши, кенг тарқалган миокард инфарктидан вафот этган», – дейилади ССВ ахборотида.

Н.Д. Соғлиқни сақлаш вазирлиги юритаётган статистикага кўра коронавируснинг 140-қурбонига айланди. «Дарё» ҳисоби бўйича коронавирусга чалингач, вафот этганлар сони 147 нафарни ташкил этмоқда.

Давлат хизматлари агентлиги 15 июль куни Навоий вилоятидаги 61 ёшли ходими Адҳамжон Деҳқонов, Маданият вазирлиги эса 18 июль куни 32 ёшли ходими Акмал Ирисов коронавирус асоратларидан вафот этгани, Олмалиқ шаҳри ҳокимлиги 9 ва 15 июль кунлари шаҳар шифохоналарида вафот этган икки аёлда коронавирус тасдиқлангани ҳақида хабар берган. Шунингдек, 22 июлда Бош прокурорнинг собиқ ўринбосари, Қорақалпоғистон прокуратурасида бўлим бошлиғи бўлиб ишлаётган 66 ёшли Ҳакимбай Халимов, Чилонзор тумани Санитария-эпидемиологик осойишталик маркази бактериология лабораторияси мудири 62 ёшли Марҳабо Аҳмедова коронавирус асоратларидан вафот этгани хабар қилинган.

Шунингдек, 31 июль куни Қорақалпоғистон Жўқорғи Кенгеси раиси, Олий Мажлис Сенати раиси ўринбосари Муса Ерниязов 72 ёшида Нукусда вафот этди. Ўзбекистон Соғлиқни сақлаш вазирлиги (ССВ) 18 июль куни Қорақалпоғистон Республикаси Жўқорғи Кенгеси раиси Муса Ерниязов коронавирусга чалингани ҳақида хабар берган эди.

Бироқ ушбу етти ўлим ҳақида ССВ томонидан айни вақтгача ахборот берилмаган.