Қорақалпоғистон ССВ Муса Ерниязовнинг касаллиги қандай кечгани ҳақида маълумот берди. У бир ой оғир аҳволда бўлган

Қорақалпоғистон Жўқорғи Кенгеси раиси, Ўзбекистон Қаҳрамони Муса Ерниязов вафот этгани ҳақида аввалроқ хабар берилганди. Сенатор ўткир нафас ва юрак қон-томир етишмовчилигидан вафот этди. Бу ҳақда Қорақалпоғистон Соғлиқни сақлаш вазирлиги хабар берди.

Вазирликнинг хабар беришича, Муса Ерниязовда касалликнинг клиник белгилари кучайгани сабабли 30 июнь куни Воҳидов номидаги ихтисослаштирилган хирургия илмий-амалий тиббиёт марказининг Нукус филиалига олиб келинган ва оғир аҳволда реанимация бўлимига ётқизилган. Беморга икки томонлама пневмониянинг оғир кечиши ташхиси қўйилган. Касаллик ўткир респиратор дистресс синдроми, ўткир нафар етишмовчилиги асоратлари билан кечган.

Шунингдек, бемор бир неча йиллардан буён қандли диабет, гипертония, юрак ишемик касалликларидан даволаниб келган.

Воҳидов номидаги ихтисослаштирилган хирургия илмий-амалий тиббиёт марказининг Нукус филиалида Муса Ерниязовни даволаш ишлари чет эллик ва Тошкент шаҳридаги етакчи шифокорлар билан консультациялар ва консилиумлар орқали амалга оширилган.

Муса Ерниязовнинг аҳволи асосий касаллик асоратлари ҳисобига стабил оғир бўлиб турган, мутахассислар томонидан ўтказилган реанимацион чораларга қарамасдан, ўткир нафас ва юрак қон-томир етишмовчилиги, ўткир респиратор дистресс синдромидан вафот этган.

Эслатиб ўтамиз, Муса Ерниязов коронавирусга чалингани ҳақидаги хабарлар июль ойи бошида пайдо бўлганди. Аммо ўшанда Қорақалпоғистон раҳбарияти бу хабарларни қатъий рад этганди. Қорақалпоғистон Соғлиқни сақлаш вазирлиги эса 31 июль куни Муса Ерниязовнинг 30 июнда касалхонага ётқизилганини хабар қилди.

Ўзбекистон Соғлиқни сақлаш вазирлиги 18 июль куни Муса Ерниязов коронавирусга чалингани ҳақида хабар берганди. ССВ Ерниязовнинг аҳволини барқарор деб баҳолаганди.

30 июлдаги АОКАда ўтказилган матбуот анжуманида Соғлиқни сақлаш вазирлиги ҳузуридаги Коронавирусга қарши кураш бўйича штаб аъзоси Анвар Алимов Муса Ерниязовнинг аҳволи оғирлиги ва у сунъий нафас олиш аппаратига уланганини маълум қилганди.