Соғлиқни сақлаш вазирлиги Тошкент шаҳри Олмазор туманида яшовчи 40 ёшли М.К. исмли коронавирусга чалинган 40 ёшли ҳомиладор аёлнинг вафот этганини хабар қилди.
Хабарга кўра, Тошкент шаҳар Олмазор туманида яшаган 40 ёшли М.К. 12—17 июль кунлари шаҳар 2-сон туғруқ комплексида 30 ҳафталик 4-ҳомиладорлик, 4-туғруқ, асоратланган акушерлик анамнези, бачадон чандиғи, икки томонлама пневмония, камқонлик, нафас етишмовчилигининг 2-даражаси ташхиси билан стационар шароитда даволанган.
Беморда COVID-19 инфекцияси борлиги тасдиқлангач, у 17 июль куни шаҳар 3-сон туғруқ комплексига ўтказилган. М.К.га COVID-19 инфекциясининг ўта оғир кечиши, икки томонлама пневмония ташхиси қўйилган. Касаллик ўткир юрак қон-томир ва нафас етишмовчилиги, сепсис, полиорган етишмовчилиги, ДВС синдром асоратлари билан кечган. Юқорида келтирилган ҳамроҳ касалликлар билан бирга беморда ҳомиланинг антенатал ўлими ҳам кузатилган.
Шифохонада беморнинг даволаниши давомида шифокорлар томонидан консультация ва консилиумлар қилинган, даволаш жараёни мутахассислар тавсияси асосида олиб борилган.
«Беморнинг аҳволи асосий касаллик асоратлари ҳисобига кескин оғирлашиб, мутахассислар томонидан ўтказилган реанимацион муолажаларга қарамай ўткир нафас ва юрак қон-томир етишмовчилиги, сепсис, полиорган етишмовчилиги, ДВС синдромдан вафот этган», – дейилади ССВ хабарида.
Коронавирусга чалинган ҳомиладор аёлларнинг ўлими ҳақида кетма-кет бешинчи кундан бери хабар берилмоқда. Бугуннинг ўзида коронавирусга чалинган иккинчи ҳомиладор аёлнинг вафот этгани хабар қилинди. Аввал Тошкентнинг Учтепа туманида яшаган 34 ёшли Ш.М. исмли аёлнинг вафот этгани ҳақида хабар берилганди.
Бунга қадар 24 июль куни қашқадарёлик 35 ёшли аёл, 25 июль куни тошкентлик 34 ёшли аёлнинг ҳомиладорлик вақтида коронавирус тасдиқлангач ҳаётдан кўз юмгани, 26 июлда эса Тошкент шаҳрида коронавирусга чалинган 32 ёшли аёлнинг вафот этгани, 27 июлда Тошкентда 35 ёшли яна бир ҳомиладор аёлнинг COVID-19 асоратлари туфайли вафот қилгани ҳақида хабарлар берилганди.
Соғлиқни сақлаш вазирлиги ҳисобига кўра, мазкур бемор коронавируснинг 125-қурбонига айланди. «Дарё» ҳисоби бўйича коронавирусга чалингач, вафот этганлар сони 131 нафарни ташкил этмоқда.
Давлат хизматлари агентлиги 15 июль куни Навоий вилоятидаги 61 ёшли ходими Адҳамжон Деҳқонов, Маданият вазирлиги эса 18 июль куни 32 ёшли ходими Акмал Ирисов коронавирус асоратларидан вафот этгани, Олмалиқ шаҳри ҳокимлиги 9 ва 15 июль кунлари шаҳар шифохоналарида вафот этган икки аёлда коронавирус тасдиқлангани ҳақида хабар берган.
Шунингдек, 22 июлда Бош прокурорнинг собиқ ўринбосари, Қорақалпоғистон прокуратурасида бўлим бошлиғи бўлиб ишлаётган 66 ёшли Ҳакимбай Халимов, Чилонзор тумани Санитария-эпидемиологик осойишталик маркази бактериология лабораторияси мудири 62 ёшли Марҳабо Аҳмедова коронавирус асоратларидан вафот этгани хабар қилинган. Бироқ ушбу олти ҳолат ҳақида ССВ томонидан айни вақтгача ахборот берилмаган.
Бундан ташқари, таниқли режиссёр Сарвар Каримов ҳам 17 июль куни отаси коронавирус инфекциясидан вафот этгани, аммо унга ташхис қўйилмаганини маълум қилганди. Режиссёрнинг ўзи ва унинг бошқа оила аъзоларида коронавирус тасдиқланган.
26 июль куни бош вазир ўринбосари Азиз Абдуҳакимов 24 июль куни Самарқанддаги Ипак йўли халқаро туризм университетининг 33 ёшли магистранти Ўткир Темиров касалликдан вафот этганини айтган. Маълум бўлишича, марҳум ўзида COVID-19’нинг барча белгилари бўлса-да, тест ҳам топшира олмаган, касалхонага ҳам ёта олмаган.
Изоҳ (0)