Андижон вилоятида карантин вақтида республика бўйлаб эркин ҳаракатланиш ҳуқуқини берувчи «яшил» йўлак рухсатномасини сохталаштирган бир гуруҳ шахслар қўлга олинди. Бу ҳақда «Дарё» мухбири хабар берди.
Вилоят ички ишлар бошқармаси ахборот хизматининг маълум қилишича, 2020 йил 23 июль куни соат 10:00 да Ички ишлар вазирлиги Ўз хавфсизлиги бошқармаси Андижон вилояти бўйича бўлими ва вилоят ИИБ ЖҚБК ва ИЖҚКБ ходимлари билан биргаликда тезкор тадбир ўтказилган.
Тадбирда фуқаролар Яшин, Марат ва Қобил (барча исмлар ўзгартирилган) ўзаро тил бириктириб, фуқаро Мавлон Ражабовнинг Spark машинасига карантин вақтида республика бўйлаб эркин ҳаракатланиш ҳуқуқини берувчи «яшил» йўлак рухсатномасини вилоят қишлоқ хўжалиги бошқармаси мутахассиси лавозимида ишлаган таниши орқали 1 миллион 200 минг сўмга олиб беришни ваъда қилиб, пулларни олаётган вақтида ушланган.
Терговга қадар текширишлар давомида Яшин ва Марат исмли фуқаролар сохта «яшил» йўлак рухсатномасини тайёрлаб, 10 дан ортиқ фуқарога 250-300 минг сўмдан сотгани аниқланган. Мазкур ҳолат бўйича вилоят ИИБ ҳузуридаги Тергов бошқармаси томонидан Жиноят кодексининг 168-моддаси 3-қисми «б» (Бир гуруҳ шахслар томонидан олдиндан тил бириктириб фирибгарлик содир этиш) банди билан жиноят иши қўзғатилиб, дастлабки тергов ҳаракатлари олиб борилмоқда.
Мавзуга доир:
- Бухорода қалбаки тош ва буюмларни 600 минг долларга пулламоқчи бўлган шахслар қўлга тушди
- Тошкентда ўзини Президент администрацияси ходими сифатида таништириб, фирибгарлик билан шуғулланган шахс ушланди (видео)
- Самарқандда қурилиши якунланмаган уйларни тайёр деб алдаб, фуқароларга сотган шахслар қўлга олинди
Изоҳ (0)