Андижон вилояти юқумли касалликлар шифохонасида 22 апрель, чоршанба куни, 26 нафар коронавирус инфекциясига чалинган бемор буткул соғайди. ССВ матбуот хизматининг хабар беришича, улар вилоят соғлиқни сақлаш бошқармалари масъуллари иштирокида реабилитацияга кузатилди.
Фото: Андижон вилояти ҳокимлиги матббуот хизмати
Соғайганларнинг барчаси Андижон вилоятидан. Беморларнинг 5 нафари эркак, 21 нафари аёллардир. Уларнинг 1 нафари хориждан келган, қолган 25 нафари коронавирусга чалинганлар билан мулоқотда бўлиб, инфекция юқтириб олган. Улар орасида энг ёши каттаси 59 ёшда бўлса, энг ёши кичиги 21 ёшда.
Вазирлик хабарида қайд этилишича, ҳозирга қадар вилоят юқумли касалликлар шифохонасида 21 нафар бемор соғайган бўлса, эндиликда улар 47 нафарга етди. 21 апрель куни 96 нафар бемор, 22 апрель куни эса 93 нафар бемор тузалиб, ўтган икки кун ичида жами 189 нафар бемор буткул соғайди.
Аввалроқ Ўзбекистонда коронавирусдан тузалганлар сони 424 нафарга етгани, улар орасида 2020 йилда туғилган чақалоқ ҳам борлиги хабар берилганди.
Шундай қилиб, айни пайтга қадар Ўзбекистонда коронавирус инфекциясидан бутунлай соғайганлар сони 450 нафарни ташкил этмоқда.
Ўзбекистонда 22 апрель соат 10:00 ҳолатига кўра, коронавирус инфекциясини юқтириб олганлар сони 1692 нафарни ташкил этмоқда. Ўзбекистонда 15 мартдан буён коронавирусга чалинган беморларнинг етти нафари вафот этди, Хорижда камида 73 ўзбекистонликда коронавирус аниқланган (энг кўпи — 42 нафари — Россияда), уларнинг тўрт нафари вафот этгани маълум қилинган.
