Ўзбекистонда мактаб ўқувчилари учун телевизион дарслар тайёрлашнинг узлуксизлигини таъминлаш ҳамда тасвирга олиш жараёнида иштирок этаётган ўқитувчилар ва уларнинг яқинларини коронавирус инфекциясидан ҳимоя қилиш мақсадида, мазкур жараёнда иштирок этаётган ўқитувчилар Тошкентдаги Президент мактабига жойлаштирилди. Бу ҳақда Халқ таълими вазирлиги хабар берди.
Маълум қилинишича, ҳукумат комиссияси теледарсларни тайёрлашда иштирок этаётган педагоглар ҳамда Ўзбекистон миллий телерадиокомпанияси ходимларининг COVID-19 инфекциясини юқтириб олишининг олдини олиш мақсадида дарсларни тасвирга олиш жараёнини керакли моддий техника базаси ва ётоқхонаси мавжуд бўлган Тошкент шаҳридаги Президент мактабида ташкил этиш бўйича қарор қабул қилди.
Карантин сабабли Ўзбекистонда мактаб ўқувчилари учун теледарслар намойиш этиш жорий йилнинг 30 март куни бошланган. Ушбу теледарслар Халқ таълими вазирлиги ҳамда Ўзбекистон миллий телерадиокомпанияси ҳамкорлигида тайёрланиб, МТРК студияларида тасвирга олинаётган эди.
Ҳозирги кунга қадар ўқитувчилар ҳамда телерадиокомпания ходимлари уйидан Ўзбекистон миллий телерадиокомпаниясининг Медиа марказига қатнаган ҳолда теледарсларни тайёрлаётган эди. Онлайн мактаб лойиҳасининг барча иштирокчиларини COVID-19 инфекциясидан ҳимоя қилиш мақсадида теледарсларни бир жойда тайёрлаш бўйича қарор қабул қилинди.
Лойиҳанинг барча 158 нафар иштирокчиси коронавирусни аниқлаш бўйича вирусологик текширувдан ўтказилди ва тест натижаларига асосан Президент мактабига жойлаштирилди. Педагог ва телерадиокомпания ходимлари фаолияти учун керакли барча шароитлар яратилган. Жумладан, жалб қилинган ходимларга алоҳида ётоқ анжомлари харид қилинган.
Теледарсларни такомиллаштириш мақсадида жалб этилган мутахассислар эса ўз фаолиятини масофадан давом эттиради. Улар теледарсларни суратга олиш учун материалларни тайёрлашга ва дарсларни эфирга узатишдан аввал кўриб чиқишга кўмак беради.
Аввалроқ мактабларда жорий ўқув йили онлайн мактаб лойиҳаси доирасида якунланиши ҳақида хабар берилган эди.
Мавзуга доир:
- Халқ таълими вазирлиги якуний давлат имтиҳонларини ўтказиш ёки уни бекор қилиш масаласини муҳокама қилмоқда
- Мактаб дарсликларини Тошкентда қолдириб, вилоятларга кетган ўқувчиларни баҳолаш қандай амалга оширилади? ХТВ жавоб берди
- Халқ таълими вазирлиги уйда якка тартибда таълим олишни ташкил этиш тартиби ҳақида маълумот берди
Изоҳ (0)