Хоразм вилоятида 22 апрель куни коронавирусга чалинган 35 нафар бемор тўлиқ тузалиб, реабилитацияга кузатилди. Бу ҳақда Соғлиқни сақлаш вазирлиги хабар берди.
Маълум қилинишича, Урганч шаҳар тиббиёт бирлашмасидан 13 нафар, вилоят эндокринология диспансеридан 21 нафар, вилоят юқумли касалликлар шифохонасидан 1 нафар, жами 35 нафар коронавирус инфекциясига чалинган бемор бутунлай соғайди.
Соғайганларнинг 31 нафари Россиядан чартер рейс билан олиб келинган. Уларда коронавирус инфекцияси тасдиқлангач, вилоятдаги шифохоналарга жойлаштирилган. Қолган 4 киши эса коронавирус инфекциясига чалинган беморлар билан мулоқот орқали касалликни юқтириб олган.
Улардан 29 нафари эркак, 6 нафари аёллардир. Беморларнинг 6 нафари Бухородан, 5 нафари Хоразмдан. Шунингдек, улар орасида 4 нафардан Қорақалпоғистон Республикаси ва Андижон вилоятида, 3 нафардан Фарғона ва Қашқадарё вилоятларида, 2 нафардан Наманган, Сирдарё, Тошкент вилоятлари ва Тошкент шаҳрида, 1 нафардан Жиззах ва Сурхондарё вилоятларида яшовчи фуқаролар бор. Тузалганларнинг энг каттаси 58 ёшда бўлса, энг кичиги 7 ёшда.
Хоразм вилоятида айни пайтга қадар коронавирусдан буткул соғайганлар сони 45 нафарга етди.
Бундан ташқари, Тошкент шаҳридаги Вирусология илмий-текшириш институти клиникасида коронавирус инфекциясига чалинган яна 17 нафар бемор соғайиб, 22 апрель куни Республика ихтисослаштирилган терапия ва тиббий реабилитация илмий-амалий тиббиёт марказига кузатилди.
Соғайган беморларнинг барчаси Тошкент шаҳридан. Улардан 16 нафари коронавирусга чалинганлар билан мулоқотда бўлиб, инфекция юқтириб олган. 1 нафари Лондондан келган. Беморлардан 4 нафари эркак, 13 нафари аёллардир. Улар орасида энг каттаси 69 ёшда, энг кичиги эса 2020 йилда туғилган, у онаси билан бирга реабилитацияга кузатилди. Самарали даволаш муолажаларидан кейин, сўнгги текширувлар уларда инфекция йўқлигини кўрсатди.
Айни пайтга қадар Ўзбекистонда коронавирус инфекциясидан соғайган беморлар сони 424 нафарга етди.
Аввалроқ Қорақалпоғистонда 1 ёшли бола коронавирусдан соғайгани ва Ўзбекистонда тузалганлар сони 372 кишига етгани ҳақида хабар берилган эди. Соғлиқни сақлаш вазирлиги Ўзбекистон бўйича 67 нафар бемор 22 апрель куни соғайиб, реабилитацияга жўнатилганини маълум қилди.
Эслатиб ўтамиз, 21 апрель куни Ўзбекистон бўйича 96 киши коронавирусдан соғайиб, реабилитацияга олинган эди.
Ўзбекистонда 22 апрель соат 10:00 ҳолатига кўра, коронавирус инфекциясини юқтириб олганлар сони 1692 нафарни ташкил этмоқда. Ўзбекистонда 15 мартдан буён коронавирусга чалинган беморларнинг етти нафари вафот этди, Хорижда камида 73 ўзбекистонликда коронавирус аниқланган (энг кўпи — 42 нафари — Россияда), уларнинг тўрт нафари вафот этгани маълум қилинган.
Изоҳ (0)