Ўзбекистонда коронавирусга чалинганлар сони 504 кишига етди

Ўзбекистонда коронавирусга чалинганлар сони 7 апрель соат Тошкент вақти билан 15:00 ҳолатига кўра, 32 кишига ошиб, 504 нафарга етди, дея хабар бермоқда Соғлиқни сақлаш вазирлиги. Аввалроқ 7 апрель соат 10:00 ҳолатига Ўзбекистонда коронавирусга чалинганлар сони 15 кишига ошиб, 472 нафарга етгани маълум қилинганди.

Ўзбекистоннинг бош давлат санитария инспектори Нурмат Отабековнинг маълум қилишича, Тошкентдаги Вирусология илмий-текшириш институти клиникасида 92 киши даволанмоқда, уларнинг 23 нафарида пневмония белгилари кузатилмоқда, беш нафар беморнинг аҳволи оғир.

Эпидемиология, микробиология ва юқумли касалликлар институти клиникасига 66 бемор жойлаштирилган, улардан бири ўрта оғир, яна бири эса ўта оғир аҳволда (аввалроқ Ўзбекистон бўйича 31 беморда пневмония кузатилаётгани, икки киши сунъий нафас олиш аппаратига улангани айтилган эди).

6 апрель соат 09:00 ҳолатига кўра камида 31 нафар беморда пневмония аломатлари кузатилаётган эди; тўққиз беморнинг аҳволи оғир деб баҳоланган, улардан икки нафари сунъий нафас олиш аппаратига уланган эди.

Ўзбекистонда коронавирусга чалиниш билан боғлиқ илк ҳолат 15 март куни аниқланган бўлса, ўтган давр мобайнида 30 кишида соғайишга эришди, икки киши касаллик қурбони бўлди.

Сўнгги маълумотларга кўра, АҚШнинг Нью-Йорк шаҳрида коронавирусдан вафот этган ўзбекистонликлар сони уч нафарга етди. Бундан ташқари, Арманистон, Қозоғистон ва Австриядаги Ўзбекистон фуқароларида ҳам коронавирус аниқлангани ҳақида хабар берилган эди.