Саудия Арабистонида коронавирусга чалинганлар сони 1203 нафарга етди. Бу ҳақда подшоҳлик Соғлиқни сақлаш вазирлигига асосланиб, «РИА Новости» хабар бермоқда.
«Коронавирусни юқтириб олиш билан боғлиқ 99 та янги ҳолат аниқланди. Янги беморларнинг 10 нафари чет элда бўлиб қайтган. Касалланганларнинг умумий сони 1203 нафарни ташкил этмоқда», — деди вазирлик расмий вакили Муҳаммад Абдулали.
Унинг сўзларига кўра, пойтахт Ар-Риёдда коронавирусга чалинган бемор вафот этган, у, шунингдек, бошқа сурункали касалликлардан ҳам азият чекарди. Шундай қилиб, Саудияда коронавирусдан вафот этганлар сони тўрт нафарга етди.
Аввалроқ Саудия Арабистонида коронавирус эпидемияси сабабли комендантлик соати жорий этилгани, шунингдек, Маккадаги ал-Ҳарам ва Мадинадаги Набавий масжидларида намоз ўқиш вақтинча тўхтатилгани ҳақида хабар берилган эди.
Маълумот учун, 28 март Тошкент вақти билан соат 21:00 ҳолатига кўра Ўзбекистонда коронавирусга чалинганлар сони 104 нафарни ташкил этмоқда, икки бемор эса вафот этган.
Изоҳ (0)