Ухань шаҳридаги метро қатновлари қисман ишга туширилди

Коронавирус пандемиясининг ўчоғи бўлган Хитойнинг Ухань шаҳри метрополитени 28 мартдан бошлаб қисман ўз ишини қайта бошлади, деб хабар беради «РИА Новости».

«28 март соат 06:30 дан бошлаб 1, 2, 3, 4, 6 ва 7-рақамли йўналишлар ўз ишини қайта бошлайди. Поездлар ҳаракати иш кунлари соат 06:00 дан 23:00 га қадар, дам олиш кунлари эса 06:30 дан 23:00 га қадар амалга оширилади», — дейилади хабарда.

Таъкидланишича, метрога тушган ҳар бир йўловчида ҳимоя ниқоблари бўлиши, чиқиш ва бошқа линияларга ўтишда «соғлиғи тўғрисидаги код»ни сканердан ўтказиши керак.

Ҳозирда Уханда метронинг жами 9 та линияси бўлиб, улар 228 та станцияни ўзида бирлаштиради. Қолган линиялар қачон ишга тушиши номаълум.

23 мартдан бошлаб шаҳардаги барча линиялар бўйлаб бўш поездлар қатнови йўлга қўйилган эди. Бундан мақсад метро тизимини текшириш ва юзага келган носозликларни бартараф этиш бўлган.

Янги турдаги COVID-19 коронавируси дастлаб Хитойнинг Хубэй провинциясидан тарқалган. Инфекция эпидемияга айланиб, мамлакатдан ташқарида ҳам тарқала бошлади. Бироқ ҳозирга келиб Хитой касаллик билан самарали курашмоқда: касалланганларнинг 90 фоиздан ортиғи соғайиб кетди, пандемия ўчоғи бўлмиш Ухань шаҳрига қўйилган транспорт чекловлари қачон олиб ташланиши маълум қилинди. 26 март ҳолатига кўра, Хитойда бир суткада коронавирусга чалиниш билан боғлиқ 67 та ҳолат аниқланган бўлиб, уларнинг барчаси четдан юқтирилган. Хитой 28 мартдан бошлаб визаси бор хорижликларнинг мамлакатга киришини тўхтатиб қўйди. Сўнгги маълумотларга кўра, бутун дунё бўйлаб 100 мингдан ортиқ одам коронавирусдан даволанишга муваффақ бўлган.