Испаниянинг 86 ёшли маликаси Парижда коронавирусдан вафот этди

Испания қироли Филипп VI нинг қариндоши Мария Тереза Бурбон-Парма Парижда 86 ёшида коронавирусдан вафот этди, деб хабар бермоқда «РИА Новости».

Унинг ўлими ҳақида марҳуманинг акаси Сикст-Генрих Бурбон-Парма ўзининг Facebook’даги саҳифасида маълум қилган. Қайд этилишича, малика якка ўзи яшаган бўлса ҳам касаллик юқтириб олган. Унинг дафн маросими 27 март куни ўтказилган.

Маълумот учун, Мария Тереза Бурбон-Парма турмушга чиқмаган, фарзандлари ҳам йўқ.

Айни пайтда Испания коронавирусга чалинганлар сони бўйича Европада Италиядан кейин иккинчи ўринда бўлиб турибди. Мамлакатда касалланганлар сони 64 минг кишидан ошиб кетган, 4 900 киши вафот этган. Испания ҳукумати 14 мартдан бошлаб одамлар ҳаракатланишини чеклаган ҳолда 15 кунлик кучайтирилган тартиб жорий этганди. 26 март куни парламент бу муддатни 11 апрелгача узайтирди.

Сўнгги маълумотларга кўра, бутун дунё бўйлаб COVID-19 коронавируси билан касалланганлар сони 597,3 минг кишига етган. Вафот этганлар сони эса 27,3 минг кишидан ошиб кетди. Ўзбекистонда эса коронавирус билан касалланганлар сони 104 кишига етди.